Dhanush: ఒకే ఫ్రేమ్‌లో ధనుష్‌- శేఖర్‌

హైదరాబాద్‌: తమిళ నటుడు ధనుష్‌ హీరోగా టాలీవుడ్‌ దర్శకుడు శేఖర్‌ కమ్ముల ఓ చిత్రం ప్రకటించిన సంగతి తెలిసిందే. శ్రీ వెంకటేశ్వర సినిమాస్‌ బ్యానర్‌పై రూపుదిద్దుకోనున్న ఈ చిత్రానికి నారాయణ్‌ దాస్‌ నారంగ్‌, రామ్మోహన్‌రావు నిర్మాతలుగా వ్యవహరిస్తున్నారు. ఇటీవల హైదరాబాద్‌ వచ్చిన ధనుష్‌ ఈ సినిమా నిర్మాతల్ని, దర్శకుడు శేఖర్‌ కమ్ములని శుక్రవారం కలిశారు. ఒకే ఫ్రేమ్‌లో ధనుష్‌- శేఖర్‌ కనిపించడంతో నెట్టింట సందడి నెలకొంది. త్వరలోనే ఈ చిత్రాన్ని పట్టాలెక్కించేందుకు సన్నాహాలు చేస్తున్నారు. ఇతర తారాగణం, టైటిల్‌, సాంకేతిక వర్గ వివరాలు త్వరలోనే ప్రకటించనున్నారు. తమిళం, తెలుగు, హిందీ భాషల్లో ఈ సినిమా తెరకెక్కనుంది. మరోవైపు ‘లవ్‌స్టోరీ’ చిత్రంతో బిజీగా ఉన్నారు దర్శకుడు శేఖర్‌ కమ్ముల. నాగ చైతన్య, సాయి పల్లవి జంటగా తెరకెక్కుతోన్న చిత్రమిది. బాలీవుడ్‌ సినిమా ‘అత్రాంగి రే’, హాలీవుడ్‌ చిత్రం ‘ది గ్రే మ్యాన్‌’తో బిజీగా ఉన్నారు ధనుష్‌.