Dhruv: విక్రమ్‌ డైలాగ్‌తో అదరగొట్టేసిన ధ్రువ్‌.. వీడియో వైరల్‌

చెన్నై: విలక్షణ నటుడు విక్రమ్‌ (Vikram) కుమారుడిగా వెండితెరకు పరిచయమయ్యారు నటుడు ధ్రువ్ (Dhruv)‌. ఇటీవల ‘మహాన్‌’ కోసం తన తండ్రితో కలిసి స్క్రీన్‌ షేర్‌ చేసుకున్న ధ్రువ్‌.. తాజాగా ‘పొన్నియిన్‌ సెల్వన్‌’ డైలాగ్‌తో అదరగొట్టేశారు. చెన్నైలో జరిగిన ఓ ఈవెంట్‌లో పాల్గొన్న ధ్రువ్‌.. ప్రేక్షకుల కోరిక మేరకు ‘పొన్నియిన్‌ సెల్వన్‌’ (Ponniyin Selvan)లో విక్రమ్‌ చెప్పిన ఓ పవర్‌ఫుల్‌ డైలాగ్‌ని చెప్పారు. దీంతో సభాప్రాంగణం మొత్తం ఈలలు, చప్పట్లతో మార్మొగింది. దీనికి సంబంధించిన ఓ వీడియో ఇప్పుడు నెట్టింట వైరల్‌గా మారింది. దీనిని చూసి నెటిజన్లు ఆనందం వ్యక్తం చేస్తున్నారు. విక్రమ్‌ డైలాగ్‌ని ధ్రువ్‌ చెబుతుంటే చూడచక్కగా ఉందంటూ ప్రశంసల వర్షం కురిపిస్తున్నారు.

ఇక, ‘పొన్నియిన్‌ సెల్వన్‌’ విషయానికి వస్తే.. మణిరత్నం తెరకెక్కించిన ఈ సినిమాలో విక్రమ్‌.. ఆదిత్య కరికాలన్‌ పాత్రలో నటించారు. చారిత్రాత్మక కథాంశంతో రూపుదిద్దుకున్న ఈ సినిమాలో ఐశ్వర్యారాయ్‌, త్రిష, కార్తి, జయం రవి తదితరులు కీలకపాత్ర పోషించారు. ఇప్పటికే ఈ సినిమా రూ.400 కోట్లకు పైగా వసూళ్లు రాబట్టినట్లు సినీ విశ్లేషకులు అంచనా.