Kriti Sanon: కృతిసనన్‌ రిలేషన్‌షిప్‌పై వరుణ్‌ధావన్‌ వైరల్‌ కామెంట్స్‌

ముంబయి: బాలీవుడ్‌ ముద్దుగుమ్మ కృతిసనన్‌ (Kriti Sanon) రిలేషన్‌షిప్‌పై నటుడు వరుణ్‌ధావన్‌ (Varun Dhawan) ఆసక్తికర వ్యాఖ్యలు చేశారు. ఓ స్టార్‌ హీరో ఆమెను ప్రేమిస్తున్నారని ఆయన చెప్పారు. ‘భేదియా’ ప్రమోషన్స్‌లో భాగంగా బీటౌన్‌ రియాల్టీ షోలో పాల్గొన్న ఆయన.. ‘‘కృతిసనన్‌ పేరు నా జాబితాలో లేదు. ఎందుకంటే ఆమె పేరు మరొకరి హృదయంలో ఉంది. ఆ వ్యక్తి ప్రస్తుతం ముంబయిలో లేడు. వేరే ప్రాంతంలో దీపికా పదుకొణెతో కలిసి షూట్‌లో ఉన్నాడు’’ అని చెప్పాడు. వరుణ్‌ వ్యాఖ్యలు అంతటా వైరల్‌గా మారాయి. ఈ వీడియో చూసిన పలువురు బీటౌన్‌ నెటిజన్లు వరుణ్‌ మాట్లాడుతున్నది ప్రభాస్‌ గురించేనని అంటున్నారు. ఈ మేరకు ప్రభాస్‌ పేరు నెట్టింట ట్రెండింగ్‌లోకి వచ్చింది. మరోవైపు ఈ విషయంపై ప్రభాస్‌ ఫ్యాన్స్‌ ఆగ్రహం వ్యక్తం చేస్తున్నారు. ‘సినిమా ప్రమోషన్‌ కోసం మా అన్న పేరుని ఇంతలా వాడుతున్నారేంటి?’ అంటూ మండిపడుతున్నారు.

బీటౌన్‌ భారీ ప్రాజెక్ట్‌ ‘ఆదిపురుష్‌’ కోసం ప్రభాస్‌-కృతిసనన్‌ కలిసి పనిచేసిన విషయం తెలిసిందే. రామాయణాన్ని ఆధారంగా చేసుకుని తెరకెక్కిన ఈ సినిమాలో రాముడిగా ప్రభాస్‌, సీతగా కృతిసనన్‌ నటించారు. ఈ సినిమా టీజర్‌ విడుదలైన నాటి నుంచి వీరిద్దరి గురించి బాలీవుడ్‌లో వరుస కథనాలు వస్తున్నాయి. ప్రభాస్‌ అంటే తనకిష్టమని, ఆయన్ని అభిమానిస్తున్నానంటూ పలు ఇంటర్వ్యూల్లో కృతి చెప్పడంతో ఈ వార్తలు మరింత ఎక్కువయ్యాయి. ఈ నేపథ్యంలో తాజాగా వరుణ్‌ ధావన్‌ చేసిన వ్యాఖ్యలు సోషల్‌మీడియాలో చర్చనీయాంశంగా మారాయి. మరోవైపు ప్రభాస్‌ ప్రస్తుతం ‘ప్రాజెక్ట్‌ కె‌’ షూట్‌లో బిజీగా ఉన్నారు. నాగ్‌ అశ్విన్‌ తెరకెక్కిస్తోన్న ఈ సినిమాలో ఆయన సరసన దీపికా పదుకొణె సందడి చేయనున్నారు.