Priyanka Chopra: నేను ‘మిస్‌ వరల్డ్‌’ అందుకున్న వేళ.. నిక్‌ వయసు ఏడేళ్లు : ప్రియాంకా చోప్రా

ఇంటర్నెట్‌డెస్క్‌: నటి ప్రియాంకా చోప్రా (Priyanka Chopra), ఆమె భర్త నిక్‌ జొనాస్‌ కంటే వయసు పరంగా పెద్దదనే విషయం విషయం తెలిసిందే. వీరిద్దరి మధ్య పదేళ్ల వ్యత్యాసం ఉంది. ఇదే విషయంపై తాజాగా ప్రియాంక మాట్లాడారు. తాను ప్రపంచ సుందరిగా కిరీటం గెలుపొందినప్పుడు నిక్‌ ఏడేళ్ల పిల్లాడని ఇది చెప్పడానికి వింతగా ఉందని ఆమె అన్నారు.

‘‘నిక్‌ని వివాహం చేసుకున్న తర్వాత వాళ్లమ్మ నాతో ఒక విషయాన్ని చెప్పారు. దాన్ని నేను ఎప్పటికీ మర్చిపోలేను. నేను ప్రపంచ సుందరిగా కిరీటం గెలుపొందినప్పుడు నా వయసు 17 ఏళ్లు. లండన్‌ వేదికగా జరిగిన ఆ పోటీల్లో నేను పాల్గొన్నాను. అప్పుడు నేనింకా చిన్నపిల్లనే. ఏం చేస్తున్నానో, నా గురించి బయటవాళ్లు ఏం అనుకుంటున్నారో కూడా తెలియదు. 2000లో జరిగిన ఆ పోటీలను మా మావయ్య- అత్తయ్య టీవీలో చూశారట. నేను టైటిల్‌ గెలుపొందిన క్షణాలు తనకింకా గుర్తేనని ఆమె నాతో చెప్పారు. అయితే అప్పుడు నిక్‌ వయసు 7 ఏళ్లు అంట. ఇంట్లో వాళ్లతోపాటు తను కూడా టీవీ ముందు కూర్చొని నన్ను చూశాడట. తలచుకుంటే వింతగా ఉంది. విధి మా ఇద్దర్నీ కలిపింది. మేము కలవాలని రాసిపెట్టి ఉంది. అందుకే వయసుపరంగా ఎంతో వ్యత్యాసం ఉన్నప్పటికీ మేమిద్దరం ప్రేమించుకుని పెద్దల అంగీకారంతో పెళ్లి చేసుకున్నాం. నిక్‌తో రిలేషన్‌లోకి వెళ్లడానికి ముందు నేను ఎంతోమందితో డేట్‌ చేశాను. అలాగే నిక్‌కు సైతం కొన్ని రిలేషన్‌షిప్స్‌ ఉన్నాయి. వాటి గురించి నేను పట్టించుకోలేదు. గతాన్ని గురించి ఆలోచించడం నాకు నచ్చదు. భవిష్యత్తు కోసం అడుగులు వేయడమే మా ఇద్దరికీ ఇష్టం’’ అని ప్రియాంక వివరించింది.