Pawan Kalyan: ఓ అభిమానిగా పవన్‌తో సినిమా తీస్తున్నా .. రీమేక్‌ ఖరారు చేసిన సముద్రఖని

ఇంటర్నెట్‌ డెస్క్‌: తమిళంలో మంచి విజయం అందుకున్న ‘వినోదాయ సీతాం’లో పవన్‌ కల్యాణ్‌ నటిస్తున్నారంటూ కొన్ని రోజుల క్రితం వార్తలొచ్చిన సంగతి తెలిసిందే. ఈ విషయంపై తాజాగా స్పష్టత వచ్చింది. మాతృక చిత్ర దర్శక- నటుడు సముద్రఖని ఓ ఇంటర్వ్యూలో పవన్‌తో రీమేక్‌ చేస్తున్నట్టు వెల్లడించారు. తాను పవన్‌ కల్యాణ్‌ అభిమానినని, తనలాంటి వారందరినీ దృష్టిలో పెట్టుకుని సినిమాను తెరకెక్కించనున్నట్టు చెప్పారు. ప్రస్తుతం సంబంధిత పనులు జరుగుతున్నాయని, త్వరలోనే అధికారికంగా ప్రకటించనున్నట్టు తెలిపారు. ఫాంటసీ డ్రామాగా రూపొందిన ఈ చిత్రంలో తంబి రామయ్య, సముద్రఖని కీలక పాత్రలు పోషించారు. తెలుగు నేటివిటీకి తగ్గట్టు రీమేక్‌లో మార్పులు చేయనున్నారని సమాచారం. పవన్‌తోపాటు సాయి ధరమ్‌తేజ్‌ ఈ సినిమాలో నటించే అవకాశాలున్నాయని ఇటీవల ప్రచారం సాగింది. దీనిపై స్పష్టత రావాల్సి ఉంది. వైవిధ్య పాత్రలతో ప్రేక్షకుల్లో మంచి గుర్తింపు పొందిన సముద్రఖని తెలుగు హీరోలతో గతంలో ‘శంభో శివ శంభో’, ‘జెండా పై కపిరాజు’ తదితర చిత్రాలు తెరకెక్కించారు.