Teja: ఉదయ్‌కిరణ్‌ చనిపోవడానికి కారణాలు నాకు తెలుసు: తేజ

హైదరాబాద్‌: నటుడు ఉదయ్‌కిరణ్‌ ఆత్మహత్య గురించి ప్రముఖ దర్శకుడు తేజ సంచలన వ్యాఖ్యలు చేశాడు. ఈ ఘటనకు సంబంధించి తనకంతా తెలుసని అన్నాడు. ‘‘నువ్వు నేను’ సినిమా సమయంలో ఎం.ఎస్‌. రాజు ఓసారి నాకు ఫోన్‌ చేశారు. తన దగ్గర ఒక కథ ఉందని.. ఉదయ్‌ ఫొటోలు పంపించమని.. ఓకే అయితే తన సినిమాలోకి తీసుకుంటానని చెప్పారు. వెంటనే నేను ‘గాజువాక పిల్లా’ వీడియోను ఆయనకు పంపించా. అది చూసిన ఆయన ఉదయ్‌కు ‘మనసంతా నువ్వే’లో ఆఫర్‌ ఇచ్చాడు. అలా, ఉదయ్‌ కిరణ్‌కు ‘నువ్వు నేను’, ‘చిత్రం’, ‘మనసంతా నువ్వే’తో బ్యాక్‌ టు బ్యాక్‌ మూడు హిట్స్‌ వచ్చాయి. దానివల్ల అతడు కాస్త బ్యాలెన్స్‌ మిస్‌ అయ్యాడు’’

‘‘స్టార్‌డమ్‌ వచ్చినప్పుడు మనిషి బ్యాలెన్స్‌ మిస్‌ కావడం సర్వసాధారణం. నేను దాన్ని పొగరు అనుకోలేదు.. అమాయకత్వం అనుకున్నా. ఆ తర్వాత అతడు చాలా సినిమాల్లో నటించాడు. సమస్యలూ ఎదుర్కొన్నాడు. అప్పుడు నేనే పిలిచి ‘ఔనన్నా కాదన్నా’లో అవకాశం ఇచ్చా. ఆ సినిమా షూటింగ్ సమయంలో  అతడు విచారం వ్యక్తం చేశాడు. ‘మీ విషయంలో నేను కాస్త పొగరుగా వ్యవహరించినా.. నన్ను గుర్తుపెట్టుకుని మరీ ఈ సినిమాలో అవకాశం ఇచ్చారు. మీ పాదాలు తాకుతా.. క్షమించానని ఒక్కసారి చెప్పండి చాలు’ అన్నాడు. అవేమీ అవసరం లేదని చెప్పా. అతడి జీవితంలో ఏం జరిగిందో అంతా నాకు తెలుసు. నాకు అన్ని విషయాలు చెప్పాడు. అతడు ఆత్మహత్య చేసుకోవడానికి గల కారణాలూ నాకు తెలుసు. సమయం వచ్చినప్పుడు వాటిని బయటపెడతా. నేను చనిపోయేలోపు ఆ విషయాలు వెల్లడిస్తా. ఇప్పుడు చెప్పడం సరైన పద్ధతి కాదు’’ అని తేజ అన్నాడు.