Aishwarya Rajesh: రయ్‌.. రయ్‌.. ‘డ్రైవర్‌ జమున’

నటనా ప్రాధాన్యమున్న పాత్రలతో మెప్పిస్తూ.. కథానాయికగా తనకంటూ ఓ ప్రత్యేక గుర్తింపు సాధించుకుంది ఐశ్వర్య రాజేష్‌. ఇప్పుడామె ‘డ్రైవర్‌ జమున’గా అలరించేందుకు సిద్ధమవుతోంది. పా.కిన్ల్సిన్‌ తెరకెక్కిస్తున్న చిత్రమిది. ఎస్‌.పి.చౌదరి నిర్మిస్తున్నారు. ఫస్ట్‌లుక్‌ను నిర్మాత దిల్‌రాజు ఇటీవల విడుదల చేశారు. ఆ పోస్టర్‌లో ఐశ్వర్య ముఖంపై చెమటలు, రక్తం మరకలతో ఆసక్తికరంగా కనిపించారు. ‘‘ఓ లేడీ క్యాబ్‌ డ్రైవర్‌ జీవితంలో జరిగిన నాటకీయ సంఘటనల నేపథ్యంలో రూపొందిన చిత్రమిది. ఆద్యంతం చాలా థ్రిల్లింగ్‌గా సాగుతుంది. ఈ పాత్ర కోసం ఐశ్వర్య చాలా మంది లేడీ క్యాబ్‌ డ్రైవర్లని కలిసి.. వారి బాడీ లాంగ్వేజ్‌కు తగ్గట్లుగా నేచురల్‌గా ఈ పాత్రకు సిద్ధమయ్యారు. స్వయంగా రోడ్లపై కారు నడిపారు. ప్రస్తుతం ముగింపు దశ చిత్రీకరణలో ఉంది. తెలుగు, తమిళం, కన్నడ, మలయాళ భాషల్లో ఏకకాలంలో విడుదల చేయనున్నాం’’ అని చిత్ర బృందం తెలిపింది. సంగీతం: జిబ్రాన్‌, కూర్పు: ఆర్‌.రామర్‌, ఛాయాగ్రహణం: గోకుల్‌ బెనోయ్‌.