Kantara: ‘కాంతార’.. ఆ స్టార్ హీరోతో చేయాలనుకున్నా: రిషబ్ శెట్టి

ఇంటర్నెట్‌డెస్క్‌: ‘కాంతార’(Kantara)తో ఒక్కసారిగా దేశవ్యాప్తంగా గుర్తింపు తెచ్చుకున్నారు కన్నడ నటుడు రిషబ్ శెట్టి (Rishab Shetty). కెరీర్‌ ఆరంభంలో ‘హీరో’, ‘బెల్‌ బాటమ్‌’ చిత్రాలతో నటుడిగా కన్నడ పరిశ్రమలో గుర్తింపు తెచ్చుకున్న ఆయన ‘కాంతార’తో బిగ్గెస్ట్‌ బ్లాక్‌బస్టర్‌ని తన ఖాతాలో వేసుకున్నారు. అయితే, ఈ చిత్రాన్ని తొలుత కన్నడ అగ్ర కథానాయకుడు, దివంగత నటుడు పునీత్‌ రాజ్‌కుమార్‌తో (Puneeth Rajkumar) చేయాలనుకున్నారట రిషబ్‌. ఇదే విషయాన్ని తాజాగా ఇచ్చిన ఓ ఇంటర్వ్యూలో ఆయన చెప్పారు.

‘‘కాంతార’ను పునీత్‌ రాజ్‌కుమార్‌తో చేయాలనుకున్నా. ఓసారి ఆయన్ని కలిసి కథ కూడా చెప్పా. ఆయనకు బాగా నచ్చింది. తప్పకుండా సినిమా చేయాలనుకున్నారు. కాకపోతే, ఆ సమయంలో ఆయన వరుస సినిమాల్లో నటిస్తున్నారు. దానివల్ల డేట్స్‌ సర్దుబాటు కాలేదు. ఓసారి నాకు ఫోన్‌ చేసి.. ‘‘కాంతార’ కథ చాలా బాగుంది. అందులో నటించడానికి వీలు పడటం లేదు. ఒకవేళ నువ్వు వెయిట్‌ చేసినా.. ఈ ఏడాది వీలుకాకపోవచ్చు. కాబట్టి, నువ్వే ఈ సినిమాలో నటించు’’ అని చెప్పారని రిషబ్ వివరించారు. రూ.16 కోట్లతో నిర్మించిన ఈ సినిమా ఇప్పుడు ప్రపంచవ్యాప్తంగా రూ.350 కోట్లు వసూళ్లు రాబట్టింది.  కేంద్రమంత్రి నిర్మలా సీతారామన్‌ బుధవారం ఈ చిత్రాన్ని వీక్షించారు. తుళునాడు సంస్కృతి, సాంప్రదాయాలను గొప్పగా ఆవిష్కరించారంటూ చిత్రబృందాన్ని ఆమె మెచ్చుకున్నారు.