ek mini katha: ఓటీటీలో వచ్చేది అప్పుడే!

‘ఏక్‌ మినీ కథ’ ఓటీటీలో విడుదలకు సిద్ధమైంది. ఈ విషయాన్ని చిత్ర బృందం గురువారం అధికారికంగా ప్రకటించింది. సంతోష్‌ శోభన్‌, కావ్య థాపర్‌ జంటగా నటించిన చిత్రమిది. దర్శకుడు కార్తీక్‌ రాపోలు తెరకెక్కించారు. యూవీ కాన్సెప్ట్స్‌ సంస్థ నిర్మించింది. ఏప్రిల్‌లోనే విడుదల కావాల్సిన ఈ చిత్రం.. కరోనా పరిస్థితుల వల్ల వాయిదా పడింది. ఇప్పుడీ సినిమాని అమెజాన్‌ ప్రైమ్‌ వీడియోలో ఈనెల 27న విడుదల చేస్తున్నట్లు ప్రకటించారు. ఈ మేరకు సామాజిక మాధ్యమాల వేదికగా కొత్త పోస్టర్లని పంచుకున్నారు. ‘‘యువతరం మెచ్చే ఓ విభిన్నమైన కథాంశంతో రూపొందిన చిత్రమిది. దీనికి దర్శకుడు మేర్లపాక గాంధీ కథ అందించారు. అందరూ సురక్షితంగా ఇంట్లోనే ఉండి ఈ సినిమా చూడాలని కోరుకుంటున్నాం’’ అని చిత్ర బృందం తెలియ జేసింది. ఈ చిత్రానికి సంగీతం: ప్రవీణ్‌ లక్కరాజు.