bollywood: 22 ఏళ్ల తర్వాత బాలీవుడ్‌లోకి ప్రముఖ నటి.. ఎవరంటే?

ఇంటర్నెట్‌ డెస్క్‌: తెరంగేట్రం చేసిన అనతికాలంలోనే స్టార్‌ నాయికగా మారిన నటి.. జ్యోతిక (Jyothika). 1998లో మొదలైన తన ప్రస్థానం నిర్విరామంగా కొనసాగుతోంది. ఇతర భాషల్లో పెద్దగా నటించకపోయినా తమిళ్‌లో వరుస అవకాశాలు అందుకుంటున్నారామె. ఓ వైపు నాయికా ప్రాధాన్య సినిమాలు చేస్తూనే మరోవైపు ఇతరుల చిత్రాల్లో కీలక పాత్రలు పోషిస్తున్నారు. ఆ క్రమంలోనే తాజాగా హిందీ సినిమాలో కీ రోల్‌ ప్లే చేసే అవకాశం దక్కించుకున్నారు. అజయ్‌ దేవ్‌గణ్‌ (ajay devgn), మాధవన్‌ (madhavan) హీరోలుగా దర్శకుడు వికాస్‌ తెరకెక్కిస్తున్న చిత్రమిది. టైటిల్‌ ఖరారుకాని ఆ సినిమా చిత్రీకరణ ఈ ఏడాది జూన్‌లో ప్రారంభంకానుంది.

‘డోలీ సజాకే రఖ్‌నా’.. ఈ హిందీ సినిమాతో నటిగా కెరీర్‌ని ప్రారంభించిన జ్యోతిక తొలి ప్రయత్నంలోనే ప్రేక్షకుల్ని ఆకట్టుకున్నారు. రెండో సినిమా ‘వాలి’ (తమిళ్‌)తో విశేష క్రేజ్‌ సంపాదించారు. హిందీలో ఆమె నటించిన రెండో సినిమా, చివరి సినిమా ‘లిటిల్‌ జాన్‌’. సంగీతం శ్రీనివాసరావు తెరకెక్కించిన ఈ చిత్రం 2001లో విడుదలైంది. ‘ఠాగూర్‌’, ‘మాస్‌’, ‘షాక్‌’ చిత్రాలతో తెలుగు ప్రేక్షకులకు బాగా దగ్గరయ్యారామె. కన్నడ, మలయాళ సినిమాల్లోనూ నటించిన ఆమె.. తన భర్త, ప్రముఖ హీరో సూర్య (suriya)తో కలిసి ‘2డీ ఎంటర్‌టైనర్‌మెంట్‌’ పతాకంపై సినిమాలు నిర్మిస్తున్నారు.