Shah Rukh Khan: నాలుగేళ్ల తర్వాత షారుఖ్‌ ఎంట్రీ.. ఎస్‌ఆర్‌కే ఫ్యాన్స్‌ సందడి..

ముంబయి: బాలీవుడ్‌ బాద్‌షా షారుఖ్‌ ఖాన్‌ (Shah rukh khan) అభిమానులందరూ ఎప్పుడెప్పుడా అని ఎదురుచూస్తోన్న సమయం వచ్చేసింది. ఆయన హీరోగా నటించిన ‘పఠాన్‌’ (Pathaan) మూవీ బుధవారం విడుదలైంది. నాలుగేళ్ల తర్వాత షారుఖ్‌ నటించిన సినిమా విడుదల కావడంతో ఆయన అభిమానులు థియేటర్ల వద్ద సందడి చేస్తున్నారు. ముంబయితోపాటు వివిధ ప్రాంతాల్లోని థియేటర్ల వద్ద భారీ కటౌట్లు ఏర్పాటు చేసి.. పాలాభిషేకాలు చేస్తున్నారు. మరోవైపు థియేటర్లలోనూ ఇదే సందడి కనబడుతోంది. షారుఖ్‌ ఎంట్రీ సీన్స్ సమయంలో అభిమానులు.. ‘ఎస్‌ఆర్‌కే’ అంటూ కేకలు వేస్తూ తమ ఆనందాన్ని వ్యక్తపరుస్తున్నారు. యాక్షన్‌ సీక్వెన్స్‌లలో షారుఖ్‌ నటన, దీపికా పదుకొణె - షారుఖ్‌ ఆన్‌స్క్రీన్‌ కెమిస్ట్రీ అదరిపోయిందని, ముఖ్యంగా సల్మాన్‌ - షారుఖ్‌ సీన్స్‌ బాగున్నాయని, సినిమా తమకు నచ్చిందంటూ పలువురు నెటిజన్లు ట్విటర్‌ వేదికగా రివ్యూలు పెడుతున్నారు. అంతేకాకుండా తమ నాలుగేళ్ల ఆకలిని ఈ సినిమా తీర్చిందని అంటున్నారు.