Updated : 28 Jun 2022 14:03 IST

Thank You: కాలేజీ జ్ఞాపకాల.. ‘ఫేర్‌వెల్‌’ గీతం

నాగచైతన్య హీరోగా విక్రమ్‌ కె.కుమార్‌ తెరకెక్కించిన చిత్రం ‘థ్యాంక్‌ యూ’. దిల్‌రాజు, శిరీష్‌ సంయుక్తంగా నిర్మించారు. రాశి ఖన్నా, మాళవిక నాయర్‌, అవికా గోర్‌ కథానాయికలు. ఈ సినిమా జులై 22న విడుదల కానుంది. ప్రచార కార్యక్రమాల్లో భాగంగా చిత్రంలోని ‘‘ఫేర్‌వెల్‌’’ అనే గీతాన్ని సోమవారం హైదరాబాద్‌లో విడుదల చేశారు. ఈ సందర్భంగా హీరో నాగచైతన్య మాట్లాడుతూ.. ‘‘మనందరి జీవితాల్లో బెస్ట్‌ టైమ్‌ కాలేజీ లైఫ్‌. ఆ తర్వాత అంతా ప్రపంచంతో పోటీ పడుతూ పరుగులు పెట్టాల్సిందే. మనం ఇక్కడ నేర్చుకున్న విషయాలే జీవితాంతం మనల్ని ముందుకు నడిపిస్తాయి. అందుకే ఈ కాలేజీ జీవితాన్ని బాగా ఆస్వాదించండి. ఈ సినిమా కోసం మూడేళ్లు కష్టపడ్డాం. విడుదల రోజే థియేటర్లో చూడండి. సామాజిక మాధ్యమాల ద్వారా మీ స్పందన తెలియజేయండి. మీ స్పందన కోసం వేచి చూస్తుంటాను’’ అన్నారు. ‘‘మనం’ తర్వాత నాగచైతన్యతో మరోసారి సినిమా చేయడం సంతోషంగా ఉంది. ఈ అవకాశమిచ్చిన దిల్‌ రాజుకు కృతజ్ఞతలు. ఈ చిత్రానికి తమన్‌ అద్భుతమైన సంగీతమందించారు. తప్పకుండా మీకు నచ్చుతుంది’’ అన్నారు దర్శకుడు. సంగీత దర్శకుడు తమన్‌ మాట్లాడుతూ.. ‘‘చాలా అందమైన సినిమా ఇది. ఈ చిత్రం చూస్తున్నప్పుడు చైతన్యలో నాగార్జున కనిపించారు. ఈ ‘ఫేర్‌వెల్‌’ పాట మంచి సందర్భంలో వస్తుంది. చూశాక ఉద్వేగానికి గురవుతారు’’ అన్నారు. ‘‘ఐదో తరగతి వరకు అమ్మానాన్నలతో ఉంటాం. తర్వాత స్కూల్‌మేట్స్‌తో కలుస్తాం. ఆ తర్వాత కళాశాలే జీవితం. అంత అనుబంధమున్న ఈ కాలేజీ లైఫ్‌ను వదిలేసి వెళ్తుంటే ఎంత భావోద్వేగాలకు గురవుతామో ఈ ‘ఫేర్‌వెల్‌’ పాట ద్వారా చెప్పాం. చిత్రం కోసం చైతన్య చాలా శ్రమించారు’’ అన్నారు నిర్మాత.


Read latest Movies News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts