KGF2: కే జీ యఫ్‌ 2 ఫస్ట్ సాంగ్ వచ్చేసింది..!

ఇంటర్నెట్‌డెస్క్‌: బిగ్గెస్ట్‌ యాక్షన్‌ ఎంటర్‌టైనర్‌గా రూపుదిద్దుకొని ప్రపంచవ్యాప్తంగా బాక్సాఫీస్‌ వద్ద కాసుల వర్షం కురిపించిన చిత్రం ‘కే జీ యఫ్‌’. యశ్‌-ప్రశాంత్‌నీల్‌ కాంబినేషన్‌లో తెరకెక్కిన ఈ చిత్రానికి ఇప్పుడు సీక్వెల్‌గా ‘కే జీ యఫ్‌-2’ సిద్ధమైన సంగతి తెలిసిందే. ఇప్పటికే చిత్రీకరణ పూర్తి చేసుకున్న ఈసినిమా విడుదల కోసం ‘కే జీ యఫ్‌’ అభిమానులందరూ ఆసక్తిగా ఎదురుచూస్తున్నారు. వేసవి కానుకగా ఏప్రిల్‌ 14న ఈ చిత్రాన్ని ప్రేక్షకుల ముందుకు తీసుకురానున్నారు. మరోవైపు సినిమా ప్రచార కార్యక్రమాలను చిత్రబృందం షురూ చేసింది. ఇందులో భాగంగా మొదటి పాటను విడుదల చేసింది. ‘తుపాన్‌’ అంటూ సాగే ఈ పాట హీరో పాత్రను వర్ణించేలా పవర్‌ఫుల్‌గా తీర్చిదిద్దారు. రవి అందించిన సంగీతం ఆకట్టుకునేలా ఉంది. భారీ అంచనాలతో వస్తోన్న ఈ చిత్రంలో బాలీవుడ్‌ నటుడు సంజయ్‌ దత్, రవీనా టాండన్‌, ప్రకాశ్‌ రాజ్‌, శ్రీనిధి శెట్టి, రావు రమేశ్‌ తదితరులు కీలకపాత్రలు పోషించారు.