Ramnath Kovind: ‘మేజర్‌’కు మాజీ రాష్ట్రపతి ప్రశంసలు

గతేడాది విడుదలైన మేజర్‌ సినిమా ఇప్పటికీ ప్రశంసలు అందుకుంటోంది. అడివి శేష్‌ ప్రధాన పాత్రలో నటించిన ఈ చిత్రంపై తాజాగా భారత మాజీ రాష్ట్రపతి రామ్‌నాథ్‌ కోవింద్‌ ప్రశంసలు కురిపించారు. ఈ మేరకు అడివి శేష్‌తో పాటు.. చిత్ర బృందాన్ని తన ఇంటికి మంగళవారం ఆహ్వానించారు. ఆ విషయాన్ని ట్విట్టర్‌ వేదికగా వెల్లడించారు శేష్‌. గౌరవనీయులైన మాజీ రాష్ట్రపతి శ్రీ రామ్‌నాథ్‌ కోవింద్‌జీని కలవడం విశేషం. మేజర్‌ సినిమాపై ఆయన స్పందించిన తీరుతో పొంగిపోయాను. ఆయనతో మంచి సంభాషణ జరిగింది. త్వరలో మేజర్‌ మొదటి వార్షికోత్సవం జరగనుంది. ఇప్పటికీ మేజర్‌ సందీప్‌ ఉన్నికృష్ణన్‌ మమ్మల్ని ఆశీర్వదిస్తునే ఉన్నారు. ఎప్పటికీ కృతజ్ఞతలు అని ట్విట్టర్‌లో పోస్టు చేశారు అడివి శేష్‌. 26/11 ఉగ్రదాడుల్లో పోరాడి ప్రాణాలను అర్పించిన మేజర్‌ సందీప్‌ ఉన్నికృష్ణన్‌ జీవితం ఆధారంగా తెరకెక్కిన చిత్రం మేజర్‌. ఈ సినిమాలో సందీప్‌ పాత్రలో అడివి శేష్‌ నటించారు. ఈ చిత్రం దేశవ్యాప్తంగా ఘన విజయం సాధించింది.