గ్రీన్‌ ఇండియా ఛాలెంజ్‌ను పూర్తి చేసిన ప్రభాస్‌

హైదరాబాద్‌: హరితహారంలో భాగంగా తెరాస ఎంపీ సంతోష్‌కుమార్‌ విసిరిన ‘గ్రీన్‌ ఇండియా ఛాలెంజ్‌’ను ఇప్పటికే పలువురు సెలబ్రిటీలు పూర్తి చేశారు. తాజాగా తన పెదనాన్న విసిరిన ఈ ఛాలెంజ్‌ను స్టార్‌ హీరో ప్రభాస్‌ స్వీకరించి, మొక్కలు నాటారు. మూడో విడత ‘గ్రీన్‌ ఛాలెంజ్‌’లో భాగంగా గురువారం ప్రభాస్‌, ఎంపీ సంతోష్‌తో కలిసి తన గెస్ట్‌ హౌస్‌లో మొక్కలు నాటారు. అనంతరం ఇరువురు ఆ మొక్కలతో కలిసి సెల్ఫీ దిగారు. ప్రస్తుతం ఈ ఫొటోలు సామాజిక మాధ్యమాల్లో వైరల్‌ అవుతున్నాయి. చాలా రోజు తర్వాత ఇలా అయినా, తమ అభిమాన కథానాయకుడిని చూసుకున్నందుకు అభిమానులు సంతోషపడుతున్నారు. 

గ్రీన్‌ ఇండియా ఛాలెంజ్‌ మూడో విడతను ప్రారంభించిన ప్రభాస్‌ ఈ సందర్భంగా వెయ్యి ఎకరాల రిజర్వ్‌ ఫారెస్టును దత్తత తీసుకోవాలని నిర్ణయించారు. అనంతరం గ్రీన్‌ ఇండియా ఛాలెంజ్‌ను రానా, రామ్‌చరణ్‌, శ్రద్ధాకపూర్‌లకు ఇచ్చారు. కీసర అటవీ అభివృద్ధి తనలో స్ఫూర్తిని నింపిందని ప్రభాస్‌ తెలిపారు.

ప్రభాస్‌ ప్రస్తుతం రాధాకృష్ణ దర్శకత్వంలో ఓ చిత్రంలో నటిస్తున్నారు. పూజాహెగ్డే కథానాయిక. లాక్‌డౌన్‌ కారణంగా ఈ సినిమా చిత్రీకరణ తాత్కాలికంగా వాయిదా పడింది. వింటేజ్‌ లవ్‌స్టోరీగా తెరకెక్కుతున్న ఈ సినిమాలోని కీలక సన్నివేశాలను లాక్‌డౌన్‌కు ముందే విదేశాల్లో చిత్రీకరించారు. ప్రస్తుతం హైదరాబాద్‌లో తీర్చిదిద్దిన ఓ సెట్‌లో కీలక సన్నివేశాలు తెరకెక్కించేందుకు సన్నాహాలు చేస్తున్నారు. దీని తర్వాత నాగ్‌ అశ్విన్‌ దర్శకత్వంలో ప్రభాస్‌ ఓ చిత్రంలో నటిస్తున్నారు. ఈ ఏడాది చివరినాటికి సినిమా సెట్స్‌పైకి వెళ్లనుంది.