Nithiin: ‘మాస్ట్రో’.. ఆఖరి ఘట్టం

బాలీవుడ్‌లో విజయవంతమైన ‘అంధాదూన్‌’ సినిమా.. తెలుగులో ‘మాస్ట్రో’గా రీమేక్‌ అవుతోంది. నితిన్‌ కథానాయకుడిగా నటిస్తున్నారు. మేర్లపాక గాంధీ తెరకెక్కిస్తున్నారు. ఎన్‌.సుధాకర్‌ రెడ్డి, నిఖితా రెడ్డి సంయుక్తంగా నిర్మిస్తున్నారు. నభా నటేష్‌ కథానాయిక. తమన్నా ఓ కీలక పాత్రలో నటిస్తోంది. కొవిడ్‌ పరిస్థితుల వల్ల ఆగిన ఈ సినిమా.. ఇప్పుడు తిరిగి సెట్స్‌పైకి వెళ్లింది. సోమవారం నుంచి హైదరాబాద్‌లో ఆఖరి షెడ్యూల్‌ ప్రారంభించినట్లు చిత్ర బృందం ప్రకటించింది. ఇందులో భాగంగా నితిన్‌, తమన్నాలపై కీలక సన్నివేశాలు చిత్రీకరిస్తున్నట్లు తెలియజేశారు. విభిన్నమైన క్రైమ్‌ కామెడీ కథాంశంతో రూపొందుతున్న చిత్రమిది. ఈ సినిమాలో నితిన్‌ అంధుడైన పియానో ప్లేయర్‌గా కనిపించనుండగా.. తమన్నా ప్రతినాయిక ఛాయలున్న పాత్రలో నటిస్తోంది. ఈ చిత్రానికి సంగీతం: మహతి స్వరసాగర్‌, ఛాయాగ్రహణం: జె.యువరాజ్‌.