MAA Elections: సీసీ టీవీ ఫుటేజ్‌ కావాలి..

- ప్రకాశ్‌రాజ్‌

మూవీ ఆర్టిస్ట్స్‌ అసోసియేషన్‌ (మా) ఎన్నికలకు సంబంధించిన సీసీ టీవీ పుటేజ్‌ ఇవ్వాలని.. ‘మా’ ఎన్నికల అధికారి కృష్ణమోహన్‌ను కోరారు నటుడు ప్రకాశ్‌రాజ్‌. ఈ మేరకు గురువారం ఆయనకు ఓ లేఖ రాశారు. ‘‘మా’ ఎన్నికల రోజున మా సభ్యులపై భౌతిక దాడులు జరిగాయి. మోహన్‌బాబు, నరేశ్‌ అనుచితంగా ప్రవర్తించారు. దానికి మీరే సాక్షి. ఆరోజు జరిగిన ఘటనలకు సంబంధించిన విజువల్స్‌ లీకయ్యాయి. ప్రజలతో పాటు ‘మా’ సభ్యులు కూడా నిజమేంటో తెలుసుకోవాలనుకుంటున్నారు. పోలింగ్‌ సమయంలో సీసీ కెమెరాల గురించి మీరు వివరించారు. అన్నింటిని మీరు రికార్డు చేసి ఉంటారని భావిస్తున్నా. దాన్ని మాకు అందించాల్సిందిగా అభ్యర్థిస్తున్నా’’ అని లేఖలో పేర్కొన్నారు. ప్రకాశ్‌ రాజ్‌ లేఖపై ఎన్నికల అధికారి కృష్ణమోహన్‌ వెంటనే స్పందించారు. ఎన్నికలకు సంబంధించిన సీసీటీవీ ఫుటేజ్‌ భద్రంగా ఉందని, నిబంధనల ప్రకారం ప్రకాశ్‌రాజ్‌కు అందిస్తామని ప్రకటించారు.