Rajinikanth: ‘పెద్దన్న’.. ఉప్పెనరా

రజనీకాంత్‌ హీరోగా దర్శకుడు శివ తెరకెక్కించిన చిత్రం ‘అన్నాత్తే’. తెలుగులో ‘పెద్దన్న’ పేరుతో రానుంది. డి.సురేష్‌బాబు, నారాయణ దాస్‌ కె.నారంగ్‌  నిర్మాతలు. నయనతార, కీర్తి సురేష్‌, ఖుష్బూ, మీనా, జగపతిబాబు తదితరులు ముఖ్య పాత్రలు పోషించారు. ఈ సినిమా దీపావళి సందర్భంగా నవంబర్‌ 4న ప్రేక్షకుల ముందుకు రానుంది. ఈ నేపథ్యంలోనే శనివారం హీరో వెంకటేష్‌ టీజర్‌ విడుదల చేశారు. ఈ ప్రచార చిత్రాన్ని తీర్చిదిద్దిన తీరును బట్టి.. సినిమాలో యాక్షన్‌తో పాటు ఫ్యామిలీ ఎమోషన్స్‌కు పెద్ద పీట వేసినట్లు అర్థమవుతోంది. రజనీ లుక్స్‌, నటన చాలా స్టైలిష్‌గా ఉన్నాయి. ‘‘పల్లెటూరోడ్ని శాంతంగానే చూసుంటావు. కోప్పడి చూడలేదు కదా. ఉప్పెనరా.. వాడికి అడ్డూ లేదు.. ఒడ్డూ లేదు’’ అంటూ టీజర్‌లో రజనీ పలికిన సంభాషణలు ప్రధాన ఆకర్షణగా నిలిచాయి. ఈ చిత్రానికి సంగీతం: డి.ఇమ్మాన్‌, ఛాయాగ్రహణం: వెట్రి.