రామ్‌.. ‘ది వారియర్‌’

రామ్‌ కథానాయకుడిగా దర్శకుడు లింగుస్వామి తెలుగు, తమిళ భాషల్లో ఓ చిత్రం రూపొందిస్తున్న సంగతి తెలిసిందే. శ్రీనివాసా చిట్టూరి నిర్మిస్తున్నారు. కృతి శెట్టి కథానాయిక. ఆది పినిశెట్టి ప్రతినాయకుడిగా నటిస్తున్నారు. ప్రస్తుతం శరవేగంగా చిత్రీకరణ జరుపుకుంటోన్న ఈ ద్విభాషా చిత్రానికి ‘ది వారియర్‌’ అనే టైటిల్‌ను ఖరారు చేశారు. దీన్ని సోమవారం అధికారికంగా ప్రకటించారు. ఈ సందర్భంగా రామ్‌ ఫస్ట్‌లుక్‌ను విడుదల చేశారు. ఈ ప్రచార చిత్రంలో రామ్‌ శక్తిమంతమైన పోలీస్‌ ఆఫీసర్‌గా ఆకట్టుకునేలా కనిపించారు. ఈ సందర్భంగా నిర్మాత మాట్లాడుతూ ‘‘రామ్‌ నటిస్తున్న 19వ చిత్రమిది. ఆయన తొలిసారి పోలీస్‌ పాత్రను పోషిస్తున్నారు. చక్కటి మాస్‌ యాక్షన్‌ ఎంటర్‌టైనర్‌గా ఈ చిత్రం రూపొందుతోంది. ‘రన్‌’, ‘పందెం కోడి’, ‘ఆవారా’ చిత్రాలను మించిన స్థాయిలో లింగుస్వామి ఈ సినిమాని తీర్చిదిద్దుతున్నారు. ప్రస్తుతం ప్రధాన తారాగణంపై కీలక సన్నివేశాలు తెరకెక్కిస్తున్నాం’’ అన్నారు. ఈ సినిమాకి దేవిశ్రీ ప్రసాద్‌ స్వరాలందిస్తున్నారు.