‘లూజర్‌ 2’.. అందరికీ కనెక్ట్‌ అవుతుంది

నాగార్జున

ప్రియదర్శి ప్రధాన పాత్రలో నటించిన వెబ్‌ సిరీస్‌ ‘లూజర్‌ 1’. ‘జీ5’ ఓటీటీలో విడుదలైన ఈ సిరీస్‌కు మంచి ఆదరణ దక్కిన సంగతి తెలిసిందే. ఇప్పుడీ సిరీస్‌కు కొనసాగింపుగా ‘లూజర్‌ 2’ ప్రేక్షకుల ముందుకొస్తోంది. శ్రవణ్‌ మాదాల, అభిలాష్‌ రెడ్డి తెరకెక్కించిన ఈ సిరీస్‌ ఈనెల 21న ‘జీ5’ ఓటీటీలో విడుదల కానుంది. ఈ నేపథ్యంలోనే సోమవారం హైదరాబాద్‌లో ప్రీరిలీజ్‌ వేడుక నిర్వహించారు. దీనికి హీరో నాగార్జున, అక్కినేని అమల, బ్యాడ్మింటన్‌ ఆటగాడు చేతన్‌ ఆనంద్‌ ముఖ్య అతిథులుగా హాజరయ్యారు. ఈ సందర్భంగా నాగార్జున మాట్లాడుతూ ‘‘లూజర్‌’ సిరీస్‌ను ప్రేక్షకులకు థ్రిల్‌ కలిగించేలా అద్భుతంగా తీశారు. ‘లూజర్‌ 2’ ట్రైలర్‌ కూడా చూశాను. ఇందులో ఉన్న కథ అందరికీ కనెక్ట్‌ అవుతుంది. ఈ చిత్రానికి పని చేసిన వారందరికీ ఆల్‌ ది బెస్ట్‌. దీన్ని ప్రేక్షకులంతా ఆదరించి టీమ్‌ను ఆశీర్వదించాలని కోరుకుంటున్నా’’ అన్నారు. ‘‘ఈ సిరీస్‌ కోసం మేమందరం చాలా కష్టపడ్డాము. ఇలాంటి మంచి కంటెంట్‌ ఉన్న సిరీస్‌లో నటించే అవకాశమిచ్చినందుకు అన్నపూర్ణ స్టూడియోస్‌కు, సుప్రియకు ధన్యవాదాలు’’ అన్నారు నటుడు ప్రియదర్శి. ఈ కార్యక్రమంలో నిర్మాత సుప్రియ, అభిలాష్‌, శశాంక్‌, రవి వర్మ, హర్షిత్‌ తదితరులు పాల్గొన్నారు.