‘ధగడ్‌ సాంబ’ వినోదాలు

సంపూర్ణేష్‌ బాబు హీరోగా ఎన్‌.ఆర్‌.రెడ్డి తెరకెక్కిస్తున్న చిత్రం ‘ధగడ్‌ సాంబ’. ఆర్‌.ఆర్‌ నిర్మాతగా వ్యవహరిస్తున్నారు. సోనాక్షి కథానాయిక. ఈ సినిమా త్వరలో ప్రేక్షకుల ముందుకు రానుంది. ఈ నేపథ్యంలోనే ఇటీవల చిత్ర టీజర్‌ విడుదల చేశారు. ఈ సందర్భంగా సంపూర్ణేష్‌ బాబు మాట్లాడుతూ ‘‘దర్శకుడు మంచి కథ ఎంపిక చేసుకున్నారు. నిర్మాత రాజు ఖర్చుకు వెనకాడకుండా ఈ సినిమాని నిర్మిస్తున్నారు. ఇప్పటి వరకు నేను చేసిన సినిమాల ద్వారా ప్రేక్షకుల్ని మెప్పించలేకపోయాననే చిన్న బాధ నాలో ఉండేది. త్వరలో విడుదల కానున్న ఈ చిత్రం మాత్రం అందరినీ అలరిస్తుందనే నమ్మకం ఉంది’’ అన్నారు. ‘‘కామెడీ, యాక్షన్‌, సెంటిమెంట్‌.. ఇలా అన్నీ సమపాళ్లలో ఉన్న చిత్రమిది. మాస్‌ ప్రేక్షకుల్ని ఆకట్టుకునేలా సంపూ ఫైట్స్‌, డ్యాన్సులు బాగా చేశారు. ఈ చిత్రంలో ఆయన్ని సరికొత్తగా చూస్తారు. నాకింత మంచి సినిమా చేసే అవకాశమిచ్చినందుకు నిర్మాత రాజుకు థ్యాంక్స్‌’’ అన్నారు దర్శకుడు. నిర్మాత మాట్లాడుతూ ‘‘ఈ చిత్రంలోని పాటల కోసం అద్భుతమైన సెట్స్‌ వేయడం జరిగింది. ఆ పాటలకు సంపూ తనదైన శైలిలో వేసిన స్టెప్స్‌ హైలైట్‌గా నిలుస్తాయి. ఈ చిత్రానికి సోనాక్షి నటన అదనపు ఆకర్షణ. అన్ని కార్యక్రమాలు పూర్తి చేసి.. సినిమాని త్వరలో ప్రేక్షకుల ముందుకు తీసుకొస్తాం’’ అన్నారు.