James: సైనికుడా వందనం

దివంగత కన్నడ నటుడు పునీత్‌ రాజ్‌ కుమార్‌ చివరి చిత్రం ‘జేమ్స్‌’ చిత్రంపై మంచి అంచనాలున్నాయి. ప్రస్తుతం ఈ సినిమాకు సంబంధించిన నిర్మాణంతర కార్యక్రమాలు జరుగుతున్నాయి. రిపబ్లిక్‌ డే సందర్భంగా ఈ చిత్రం నుంచి పునీత్‌కు సంబంధించిన ప్రత్యేక పోస్టర్‌ను విడుదల చేశారు. ఇందులో సైనికుడి గెటప్‌లో ఉన్న పునీత్‌ లుక్‌ ఆకట్టుకుంటోంది. పోస్టర్‌పై ‘‘దేశానికి మీ శక్తినివ్వండి. సైనికుడా వందనం’’అని రాసింది చిత్రబృందం. చేతన్‌ కుమార్‌ తెరకెక్కించిన ఈ చిత్రంలో పునీత్‌ సోదరులు రాఘవేంద్ర రాజ్‌కుమార్‌, శివరాజ్‌కుమార్‌  నటించడం విశేషం. పునీత్‌ పుట్టినరోజు సందర్భంగా మార్చి 17న థియేటర్లలో విడుదల చేయడానికి సన్నాహాలు చేస్తున్నారు.