Rgv: వర్మ ‘డేంజరస్‌’ సినిమాకు చుక్కెదురు

ఈనాడు డిజిటల్‌, హైదరాబాద్‌: దర్శకుడు రాంగోపాల్‌ వర్మ తీసిన ‘మా ఇష్టం’ (డేంజరస్‌) సినిమాకు హైదరాబాద్‌ సిటీ సివిల్‌కోర్టు బ్రేక్‌ వేసింది. తనకు వాయిదా పద్ధతిన ఇవ్వాల్సిన రూ.50 లక్షలు ఇవ్వడం లేదని తెలుగు సినీ నిర్మాత నట్టికుమార్‌, కుమారుడు నట్టి క్రాంతి న్యాయస్థానాన్ని ఆశ్రయించారు. దీంతో గురువారం కేసును విచారించిన న్యాయస్థానం తదుపరి ఆదేశాలు ఇచ్చేవరకు సినిమా విడుదలను ఆపేయాలని రాంగోపాల్‌వర్మకు ఆదేశాలు జారీ చేసింది. ఈ సినిమాను ఏ ఆన్‌లైన్‌ వేదికలోనూ విడుదల చేయొద్దని కోర్టు స్పష్టం చేసింది. కేసు తదుపరి విచారణను ఈనెల 13కి వాయిదా వేసింది.