ఆట మొదలెట్టిన జాన్వీ

హారర్‌ కామెడీ సినిమా ‘రూహీ’తో అలరించిన జంట రాజ్‌కుమార్‌ రావ్‌, జాన్వీ కపూర్‌. వీరిద్దరి కలయికలో మరో చిత్రం రానున్న విషయం తెలిసిందే. అదే ‘మిస్టర్‌ అండ్‌ మిసెస్‌ మాహీ’. ఇందులో జాన్వీ, రాజ్‌కుమార్‌లు మహిమ, మహేంద్ర అనే పాత్రల్లో కనిపిస్తారు. ధర్మ ప్రొడక్షన్స్‌ నిర్మిస్తున్న ఈ చిత్ర షూటింగ్‌ సోమవారం నుంచి మొదలయింది. శరణ్‌శర్మ దర్శకత్వం వహిస్తున్న ఈ చిత్రం క్రికెట్‌ నేపథ్యంగా సాగుతుంది. దీని కోసం జాన్వీ కపూర్‌ భారత క్రికెటర్‌ దినేశ్‌ కార్తీక్‌ సాయంతో ఆటకు సంబంధించిన మెలకువలను సైతం నేర్చుకోవడం విశేషం. చిత్రీకరణను వేగంగా ముగించి ఈ ఏడాది అక్టోబరు 7న ప్రేక్షకుల ముందుకు వస్తామని చిత్రబృందం తెలిపింది.