Tollywood: ఆకాశమే నువ్వని...

వరుణ్‌సందేశ్‌, డాలీషా జంటగా నటించిన చిత్రం ‘డైమండ్‌ రాజా’. శ్రీ ఓబులేశ్వర ప్రొడక్షన్స్‌ పతాకంపై తమటం కుమార్‌రెడ్డి, బి.క్రాంతి ప్రభాత్‌రెడ్డి నిర్మిస్తున్నారు. అచ్చు రాజమణి స్వరకర్త. ఆకాశమే నువ్వని... అంటూ సాగే ఈ చిత్రంలోని గీతాన్ని ఇటీవల హైదరాబాద్‌లో విడుదల చేశారు. సిద్‌ శ్రీరామ్‌, చిన్మయి శ్రీపాద ఆలపించిన ఈ పాటకి రాంబాబు గోసాల సాహిత్యం అందించారు. నిఖిల్‌ ముఖ్య అతిథిగా హాజరై పాటని విడుదల చేశారు. అనంతరం ఆయన మాట్లాడుతూ ‘‘సిద్‌శ్రీరామ్‌, చిన్మయి బాగా పాడారు. ఈ పాట పెద్ద విజయం సాధిస్తుంది. వరుణ్‌ పాటలో చాలా బాగున్నాడు. ‘డైమండ్‌ రాజా’తో వరుణ్‌కి విజయం రావాలని కోరుకుంటున్నా’’ అన్నారు. వరుణ్‌ సందేశ్‌ మాట్లాడుతూ ‘‘నా కెరీర్‌లో అరెరే.., నిజంగా... తదితర పాటలు ఘన విజయాన్ని అందుకున్నాయి. ఈ పాట వాటి సరసన నిలుస్తుందని నమ్ముతున్నా. ఇంటిల్లిపాదీ కలిసి చూసేలా ఈ సినిమా ఉంటుంది’’ అన్నారు.