Chiranjeevi: పరిశ్రమలో విజయోత్సాహం

చాలా రోజుల తర్వాత బాక్సాఫీసు వసూళ్లతో కళకళలాడుతోంది. మూలనపడిన హౌస్‌ఫుల్‌ బోర్డులు థియేటర్ల గేట్లకు మళ్లీ వేలాడాయి. ఈ శుక్రవారం విడుదలైన రెండు సినిమాలూ విజయం దిశగా దూసుకెళుతుండడంతో చిత్రసీమలో హర్షాతిరేకాలు వ్యక్తం అవుతున్నాయి. చిరంజీవి ట్విటర్‌ వేదికగా స్పందిస్తూ... ‘‘ప్రేక్షకులు సినిమా థియేటర్లకి రావడం లేదని బాధపడుతున్న పరిశ్రమకి ఎంతో ఊరటని, ప్రోత్సాహాన్ని అందించారు. కంటెంట్‌ బాగుంటే ఆదరణ తప్పకుండా ఉంటుందని మరోసారి నిరూపిస్తూ రెండు చిత్రాలకి విజయాల్ని కట్టబెట్టడం సంతోషకరం’’ అంటూ ట్వీట్‌ చేశారు. నిర్మాతల మండలి కార్యదర్శులు టి.ప్రసన్నకుమార్‌, మోహన్‌ వడ్లపట్ల ఓ ప్రకటనని విడుదల చేశారు. ‘బింబిసార’, ‘సీతారామం’ సినిమాల విజయం పరిశ్రమలో ఓ పండగ వాతావరణాన్ని సృష్టించాయని అందులో పేర్కొన్నారు.