కొత్త చిత్రం.. వచ్చే వేసవి నుంచి

ఎన్టీఆర్‌ - ప్రశాంత్‌ నీల్‌ కలయికలో సినిమా వచ్చే ఏడాది వేసవిలో మొదలు కానుంది. ఆ విషయాన్ని దర్శకుడు ప్రశాంత్‌ నీల్‌ స్వయంగా వెల్లడించారు. ప్రస్తుతం ఆయన ప్రభాస్‌తో ‘సలార్‌’ తెరకెక్కిస్తున్న విషయం తెలిసిందే. ఆ సినిమాని వచ్చే ఏడాది సెప్టెంబర్‌లో ప్రేక్షకుల ముందుకు తీసుకొస్తున్నట్టు సోమవారమే ప్రకటించారు. అయితే ఎన్టీఆర్‌తో తీయనున్న కొత్త సినిమాని ఏప్రిల్‌, మే నెలల్లోనే ప్రారంభించనున్నట్టు ప్రశాంత్‌నీల్‌ సోమవారం మీడియాతో వెల్లడించారు. అంటే ఒకవైపు ‘సలార్‌’ నిర్మాణానంతర కార్యక్రమాలు జరుపుతూనే, మరోపక్క ఎన్టీఆర్‌ సినిమాని షురూ చేస్తారన్నమాట. ఎన్టీఆర్‌ ప్రస్తుతం తన 30వ సినిమాని పట్టాలెక్కించే ప్రయత్నాల్లో ఉన్నారు. కొరటాల శివ దర్శకత్వం వహిస్తున్న ఆ చిత్రం పూర్వ నిర్మాణ పనులు కొనసాగుతున్నాయి.