SSMB 28: మహేష్‌ 28... ఏప్రిల్‌ 28న

ఈ ఏడాది పట్టాలెక్కుతున్న ప్రతిష్టాత్మక ప్రాజెక్టుల్లో మహేష్‌బాబు - త్రివిక్రమ్‌ సినిమా ఒకటి. మహేష్‌ 28వ సినిమా ఇది. చిత్రీకరణ ఇంకా మొదలు కాలేదు. అప్పుడే విడుదల తేదీని ప్రకటించారు. వచ్చే ఏడాది ఏప్రిల్‌ 28న చిత్రాన్ని ప్రేక్షకుల ముందుకు తీసుకొస్తున్నట్టు గురువారం ఓ ప్రత్యేక వీడియోతో ప్రకటించింది చిత్రబృందం. వచ్చే వేసవిలో మహేష్‌ సినిమా హంగామా కొనసాగుతుందన్నమాట. ‘అతడు’, ‘ఖలేజా’ తర్వాత మహేష్‌బాబు - త్రివిక్రమ్‌ కలిసి చేస్తున్న సినిమా ఇది. పూజాహెగ్డే కథానాయిక. హారిక అండ్‌ హాసిని క్రియేషన్స్‌ పతాకంపై ఎస్‌.రాధాకృష్ణ (చినబాబు) నిర్మిస్తున్నారు. త్వరలోనే చిత్రీకరణ మొదలు కానుంది. ప్రస్తుతం పూర్వ నిర్మాణ పనులు జరుగుతున్నాయి. మహేష్‌బాబు ఈ చిత్రం కోసం ఓ ప్రత్యేకమైన లుక్‌ని సిద్ధం చేస్తున్నట్టు తెలుస్తోంది. ఈ చిత్రానికి సంబంధించిన మరిన్ని ఆసక్తికరమైన  విషయాలు, ఇతర వివరాల్ని త్వరలోనే తెలియజేస్తామని నిర్మాత తెలిపారు. ఛాయాగ్రహణం: పి.ఎస్‌.వినోద్, కళ: ఎ.ఎస్‌.ప్రకాశ్, కూర్పు: నవీన్‌ నూలి, సంగీతం: తమన్‌.