Sai Pallavi: అలా జరగనప్పుడు చేదు ఫలితమే!

‘‘నా మనసుకు నచ్చిన పాత్రలు చేస్తున్నానా? లేదా? అన్నదే నాకు సంతృప్తినిస్తుంది తప్ప.. కథ మొత్తం నా చుట్టూ తిరుగుతుందా? లేదా? అన్నది కాదు’’ అంటోంది నటి సాయిపల్లవి (Sai Pallavi). ఓ పాత్ర ఎలా చేయాలన్న విషయంలో తానెప్పుడూ ఎలాంటి నిబంధనలు పెట్టుకోనని, తన పాత్ర కోసం ముందుగానే ప్రత్యేకంగా సిద్ధమయ్యే ప్రయత్నాలు చేయనని చెప్పింది. సెట్లోని వాతావరణం.. తోటి నటీనటుల అభినయమే తన పాత్ర ఎలా పోషించాలన్న విషయంలో స్పష్టతనిస్తుందని తెలియజేసింది. ఓ కథని చదివేటప్పుడే దాన్ని ఓ సినిమాలా ఆస్వాదించే ప్రయత్నం చేస్తానని చెప్పింది. ‘‘నేనెప్పుడూ ఓ స్క్రిప్ట్‌ని ప్రేక్షకుడు సినిమా ఎలా చూస్తాడో.. అలాగే చదివి ఆస్వాదించే ప్రయత్నం చేస్తా. దాని వల్ల తెరపై నా పాత్ర ఎలా ఉంటుందన్నది ముందే ఓ అవగాహన వస్తుంది. కొన్నిసార్లు మనం పేపర్‌పై చూసిన కథ అదే విధంగా తెరపైకి రాకపోవచ్చు. అలాంటప్పుడు చేదు ఫలితాలు ఎదుర్కోక తప్పదు. అయితే అదీ ఓ అనుభవ పాఠమే’’ అని చెప్పుకొచ్చింది సాయిపల్లవి.