ముగ్గురూ ఒకే ఫ్రేమ్‌లో!

కథానాయకులు ఒకరి సినిమాలో మరొకరు అతిథి పాత్రల్లో తళుక్కుమనడం సాధారణమే. అభిమానుల్ని ప్రత్యేకంగా ఆకర్షించే అంశం అది. చిన్న పాత్రలే అయినా  అవి కొన్నిసార్లు చాలా ప్రభావం చూపిస్తుంటాయి. ‘విక్రమ్‌’ సినిమాలో సూర్య పాత్ర చేసిన హంగామా అంతా ఇంతా కాదు. బాలీవుడ్‌ అగ్ర కథానాయకుడు సల్మాన్‌ఖాన్‌ సినిమాలోనూ రామ్‌చరణ్‌ అతిథి పాత్రలో సందడి చేయనున్నాడు. ఆ విషయాన్ని సల్మాన్‌ స్వయంగా బయటపెట్టారు. ఆయన కథానాయకుడిగా హిందీలో ‘కిసీ కా భాయ్‌ కిసీ కి జాన్‌’ అనే సినిమా రూపొందుతున్న సంగతి తెలిసిందే. ఇందులో వెంకటేష్‌ ఓ కీలక పాత్ర పోషిస్తున్నారు. ఆ సినిమా చిత్రీకరణ హైదరాబాద్‌లో జరుగుతుండగా, సెట్‌కి వెళ్లిన రామ్‌చరణ్‌ ‘మీ ఇద్దరితో కలిసి ఒకే ఫ్రేమ్‌లో కనిపించాలని ఉంది’ అంటూ తన అభిప్రాయాన్ని బయటపెట్టాడట.  మొదట సరదాగా అంటున్నాడేమో అనుకున్నా మరుసటి రోజు నిజంగానే సెట్‌కి వచ్చాడట. అలా రామ్‌చరణ్‌ తన సినిమాలో అతిథి పాత్రలో నటించాడని, సెట్‌లో మేం కలిసి నటించడం ఓ మంచి అనుభవం అని ఇటీవల ముంబయిలో జరిగిన ఓ కార్యక్రమంలో చెప్పారు సల్మాన్‌ఖాన్‌.