ధనుష్‌తో త్రిభాషా చిత్రం

తమిళ కథానాయకులు తెలుగు దర్శకులతోనూ... తెలుగు కథానాయకులు తమిళ దర్శకులతోనూ జట్టు కడుతున్నారు. ఈ కలయికలు ప్రేక్షకుల్లోనూ... పరిశ్రమ వర్గాల్లోనూ ఆసక్తిని రేకెత్తిస్తున్నాయి. ధనుష్‌ - శేఖర్‌ కమ్ముల కలయిక కూడా ఈ జాబితాలో ఒకటి. సున్నితమైన కథాంశాలతో సినిమాల్ని తెరకెక్కిస్తూ ప్రేక్షకుల్ని మెప్పిస్తున్న శేఖర్‌ కమ్ముల... ఈసారి ధనుష్‌ కథానాయకుడిగా తెలుగు, తమిళం, హిందీ భాషల్లో ఓ చిత్రాన్ని తెరకెక్కిస్తున్నారు. అమిగోస్‌ క్రియేషన్స్‌ సంస్థతో కలిసి శ్రీ వెంకటేశ్వర సినిమాస్‌ పతాకంపై సునీల్‌ నారంగ్‌, పూస్కూర్‌ రామ్మోహన్‌రావు నిర్మిస్తున్నారు. సోనాలి నారంగ్‌ సమర్పకులు. ఈ సినిమా సోమవారం హైదరాబాద్‌లో పూజా కార్యక్రమాలతో లాంఛనంగా మొదలైంది. ఇంకా పేరు ఖరారు కాని ఈ చిత్రంలో వివిధ భాషలకి చెందిన నటులు కనిపిస్తారని, కథకి తగ్గట్టుగా భారీ హంగులతో సినిమా రూపొందుతుందని చిత్రవర్గాలు తెలిపాయి.