కొన్నిసార్లు తిరుగుబాటు అవసరం

‘‘కొన్నిసార్లు తిరుగుబాటు అవసరం అవుతుంది’’ అంటూ రామ్‌చరణ్‌ కథానాయకుడిగా తాను చేయనున్న చిత్రాన్ని అధికారికంగా ప్రకటించారు దర్శకుడు బుచ్చిబాబు సానా. ‘ఉప్పెన’తో ప్రయాణం మొదలుపెట్టిన ఆయన దర్శకత్వంలో రూపొందుతున్న రెండో చిత్రమిది. మైత్రీ మూవీ మేకర్స్‌ సమర్పణలో...  సుకుమార్‌ రైటింగ్స్‌తో కలిసి వృద్ధి సినిమాస్‌ పతాకంపై వెంకట సతీష్‌ కిలారు నిర్మిస్తున్నారు. కథానాయకుడు రామ్‌చరణ్‌కి ఉన్న ఇమేజ్‌ని దృష్టిలో పెట్టుకుని బుచ్చిబాబు శక్తిమంతమైన స్క్రిప్ట్‌ని సిద్ధం చేశారనీ, పాన్‌ ఇండియా స్థాయిలో అధిక నిర్మాణ వ్యయంతో ఈ చిత్రాన్ని తెరకెక్కించనున్నామని సినీ వర్గాలు తెలిపాయి. వచ్చే ఏడాది నుంచి ఈ సినిమా మొదలయ్యే అవకాశాలున్నాయి. క్రీడా నేపథ్యంలో సాగే కథతో ఈ చిత్రం రూపొందుతున్నట్టు సమాచారం. రామ్‌చరణ్‌ స్పందిస్తూ ‘‘బుచ్చిబాబు, ఆయన బృందంతో కలిసి పనిచేయడం కోసం ఎదురు చూస్తున్నా’’  అంటూ ట్వీట్‌ చేశారు.