Ram Charan: ప్రత్యేకం న్యూజిలాండ్‌ పాట

శంకర్‌ (Shankar) సినిమా అనగానే భారీ హంగులే గుర్తొస్తాయి. ప్రతి సన్నివేశంపైనా తనదైన ముద్ర కనిపిస్తుంటుంది. ఇక పాటలు, పోరాట ఘట్టాలైతే మరింత ప్రత్యేకం అనిపిస్తాయి. ప్రస్తుతం రామ్‌చరణ్‌ (Ram Charan) కథానాయకుడిగా శంకర్‌ తెరకెక్కిస్తున్న సినిమాలోనూ అద్భుతం అనిపించేలా సన్నివేశాల్ని మలుస్తున్నట్టు సమాచారం. ఇటీవలే ఓ పాట చిత్రీకరణ కోసం న్యూజిలాండ్‌ వెళ్లిన  చిత్రబృందం... అక్కడ షెడ్యూల్‌ని పూర్తి చేసింది. ఆ విషయాన్ని రామ్‌చరణ్‌ ట్విటర్‌ ద్వారా తెలిపారు. న్యూజిలాండ్‌లోని పలు ప్రదేశాల్లో దాదాపు ఎనిమిది రోజులపాటు ఓ పాటని తెరకెక్కించారు. ఈ పాట, విజువల్స్‌ అద్భుతంగా ఉంటాయని, దర్శకుడు శంకర్‌, నృత్య దర్శకులు బాస్కో సీజర్‌, ఛాయాగ్రాహకుడు తిరు ఈ పాటని మరింత ప్రత్యేకం చేశారంటూ చరణ్‌ ట్వీట్‌ చేశారు.  ఇందులో రామ్‌చరణ్‌కి జోడీగా కియారా అడ్వాణీ నటిస్తున్నారు. శ్రీ వెంకటేశ్వర క్రియేషన్స్‌ పతాకంపై దిల్‌రాజు నిర్మిస్తున్నారు. ఆయనకి ఇది 50వ చిత్రం.