బాలకృష్ణకు జోడీగా ప్రియాంక?

‘టాక్సీవాలా’ చిత్రంతో తొలి అడుగులోనే సినీప్రియుల్ని మెప్పించిన అందం ప్రియాంక జవాల్కర్‌. ‘తిమ్మరుసు’, ‘ఎస్‌.ఆర్‌.కల్యాణమండపం’ సినిమాలతో వరుస విజయాలు అందుకున్నా.. ఆ తర్వాత అదే స్థాయిలో జోరు చూపలేకపోయింది. ఆమె ‘గమనం’ తర్వాత ఇంత వరకు మరో కొత్త కబురు వినిపించలేదు. అయితే ఇప్పుడామె ఓ క్రేజీ అవకాశం అందుకున్నట్లు తెలుస్తోంది. బాలకృష్ణ కథానాయకుడిగా అనిల్‌ రావిపూడి దర్శకత్వంలో ఓ చిత్రం రూపొందుతోన్న సంగతి తెలిసిందే. సాహు గారపాటి, హరీష్‌ పెద్ది నిర్మిస్తున్నారు. శ్రీలీల కీలక పాత్ర పోషిస్తోంది. ఇందులో బాలయ్యకు జోడీగా ప్రియాంక సందడి చేయనుందని సమాచారం. ఇప్పటికే ఆమెపై ఓ ఫొటో షూట్‌ కూడా నిర్వహించినట్లు తెలిసింది. శక్తిమంతమైన యాక్షన్‌ కథాంశంతో రూపొందుతోన్న చిత్రమిది. ఈనెల 8న చిత్రీకరణ ప్రారంభమవుతుంది. తొలి షెడ్యూల్‌లో భాగంగా బాలకృష్ణపై పోరాట ఘట్టాలు తెరకెక్కించనున్నారు. ఈ చిత్రానికి తమన్‌ స్వరాలందించనున్నారు.