Connect: లాక్‌డౌన్‌కు 24గంటల ముందు

99 నిమిషాల హారర్‌ ప్రపంచాన్ని ఏకధాటిగా ఆస్వాదించాలంటే మా ‘కనెక్ట్‌’ (Connect) చూడాల్సిందే అంటోంది ఆ చిత్రబృందం. నయనతార (Nayanthara) ప్రధాన పాత్రధారిగా రూపొందిన చిత్రమిది. అనుపమ్‌ ఖేర్‌, సత్యరాజ్‌, వినయ్‌రాయ్‌, హనియ నఫిస కీలక పాత్రలు పోషించారు. అశ్విన్‌ శరవణన్‌ దర్శకుడు. విఘ్నేష్‌ శివన్‌ నిర్మించారు. ఈ చిత్రాన్ని ఈ నెల 22న  తెలుగు ప్రేక్షకుల ముందుకు తీసుకొస్తోంది యు.వి.క్రియేషన్స్‌. శుక్రవారం ట్రైలర్‌ని విడుదల చేశారు. ‘దేశంలో లాక్‌డౌన్‌ విధించడానికి 24 గంటల ముందు అంతా బాగుంది...’  అంటూ మొదలయ్యే ఈ ట్రైలర్‌ ఆసక్తిని  రేకెత్తిస్తోంది. ‘‘నయనతార ఓ అమ్మాయికి  తల్లిగా కనిపించనుంది. భయపెడుతూ థ్రిల్‌ని పంచే చిత్రమిద’’ని సినీ వర్గాలు తెలిపాయి. ఈ చిత్రానికి సంగీతం: పృథ్వీ చంద్రశేఖర్‌, ఛాయాగ్రహణం: మణికంఠన్‌, కృష్ణమాచారి.