డీజే సందడి షురూ..

దర్శకుడు అనురాగ్‌ కశ్యప్‌, కథానాయకుడు విక్కీ కౌశల్‌ కలయికలో పట్టాలెక్కుతున్న చిత్రం ‘ఆల్మోస్ట్‌ ప్యార్‌ విత్‌ డీజే మొహబ్బత్‌’. ఇది ఎవరి కథ? ఇందులో విక్కీ కౌశల్‌ పాత్ర ఎలా ఉండబోతోంది అనే విషయంపై అభిమానులు, పరిశ్రమ వర్గాల్లో చాలా అంచనాలు, ఊహాగానాలే ఉన్నాయి. వీటన్నింటికీ ఆదివారం తెర దించారు. స్పష్టతనిచ్చారు. ఇందులో విక్కీ కౌశల్‌ డీజే మొహబ్బత్‌గా కనిపించనున్నారని అనురాగ్‌ కశ్యప్‌ ప్రకటించారు. సామాజిక మాధ్యమాల్లో తన ఫస్ట్‌లుక్‌ పోస్టర్‌ని విడుదల చేశారు. ఇందులో విక్కీ డీజేగా సందడి చేస్తూ కనిపించారు. రొమాంటిక్‌ థ్రిల్లర్‌గా తెరకెక్కే ఈ సినిమాలో విక్కీ కౌశల్‌ విభిన్నమైన పాత్ర పోషించాడంటోంది నిర్మాణ సంస్థ జీ స్టూడియోస్‌. అలాయా ఎఫ్‌, కరణ్‌ మెహతా కీలక పాత్రలు పోషించిన ఈ చిత్రం ఫిబ్రవరి 3న ప్రేక్షకుల ముందుకొస్తోంది.