వేసవి బరిలో స్పై

‘కార్తికేయ2’తో జాతీయ స్థాయిలో గుర్తింపు తెచ్చుకున్నారు యువ హీరో నిఖిల్‌. ఇటీవలే ‘18పేజెస్‌’తో మరోసారి సత్తా చాటారు. ఇప్పుడు ‘స్పై’గా థ్రిల్‌ చేసేందుకు సిద్ధమవుతున్నారు. ఛాయాగ్రహకుడు బీహెచ్‌.గ్యారీ తెరకెక్కిస్తున్న తొలి చిత్రమిది. కె.రాజశేఖర్‌ రెడ్డి నిర్మిస్తున్నారు. ఈ సినిమా వేసవి కానుకగా పాన్‌ ఇండియా స్థాయిలో విడుదల కానుంది. ఈ విషయాన్ని నిఖిల్‌ సామాజిక మాధ్యమాల ద్వారా వెల్లడించారు. ఈ సందర్భంగా సినిమాలోని ఓ కొత్త లుక్‌ను పంచుకున్నారు. అందులో ఆయన స్పైగా గన్‌ పట్టుకొని స్టైలిష్‌ లుక్‌తో కనిపించారు. వినూత్నమైన స్టైలిష్‌ యాక్షన్‌ థ్రిల్లర్‌గా ముస్తాబవుతున్న ఈ చిత్రం ప్రస్తుతం శరవేగంగా చిత్రీకరణ జరుపుకుంటోంది. ఇందులో నిఖిల్‌కు జోడీగా ఐశ్వర్య మేనన్‌ నటిస్తోంది. శ్రీచరణ్‌ పాకాల స్వరాలందిస్తున్నారు.