చిరు ఉదారత

కథానాయకుడు చిరంజీవి మరోసారి తన ఉదారతను చాటుకున్నారు. ఆర్థిక ఇబ్బందుల్లో ఉన్న సీనియర్‌ ఛాయాగ్రాహకుడు దేవరాజ్‌ను ఆదుకునేందుకు ముందుకొచ్చారు. ఆయన్ని తన నివాసానికి ఆహ్వానించి ఆతిథ్యం అందించడంతో పాటు రూ.5లక్షలు ఆర్థిక సాయమందించి అండగా నిలిచారు. 1980-90ల మధ్య కాలంలో దేవరాజ్‌ స్టార్‌ ఛాయాగ్రాహకుడిగా ఓ వెలుగు వెలిగారు. ఎన్టీఆర్‌, ఏయన్నార్‌, కృష్ణ, ఎంజీఆర్‌, రాజ్‌కుమార్‌, రజనీకాంత్‌.. ఇలా ఎందరో ప్రముఖ హీరోల చిత్రాలకు పని చేశారు. చిరంజీవి నటించిన ‘నాగు’, ‘పులిబెబ్బులి’, ‘రాణి కాసుల రంగమ్మ’ లాంటి చిత్రాలకు ఛాయాగ్రాహకుడిగా వ్యవహరించారు.