విజయ్‌-పరశురామ్‌.. మరోసారి

కథానాయకుడు విజయ్‌ దేవరకొండ, దర్శకుడు పరశురామ్‌ మరోసారి చేతులు కలిపారు. ‘గీత గోవిందం’ హిట్‌ తర్వాత ఈ ఇద్దరి కలయికలో రూపొందనున్న ఈ చిత్రాన్ని దిల్‌రాజు, శిరీష్‌ సంయుక్తంగా నిర్మించనున్నారు. ఈ ప్రాజెక్ట్‌ను ఆదివారం అధికారికంగా ప్రకటించారు. ఈ మేరకు విజయ్‌, పరశురామ్‌, దిల్‌రాజు కలిసి దిగిన ఓ ఫొటోను సామాజిక మాధ్యమాల్లో పంచుకున్నారు. కొత్తదనం నిండిన ఓ వినూత్న కథాంశంతో.. భారీ బడ్జెట్‌తో ఈ చిత్రం తెరకెక్కనుంది. నటీనటులు, ఇతర సాంకేతిక నిపుణుల వివరాల్ని త్వరలో ప్రకటించనున్నారు. విజయ్‌ ప్రస్తుతం శివ నిర్వాణతో ‘ఖుషి’ చేస్తుండగా.. గౌతమ్‌ తిన్ననూరి దర్శకత్వంలోనూ ఓ సినిమా చేయనున్నారు.