Sridevi: చైనాలో శ్రీదేవి ఇంగ్లిష్‌ వింగ్లిష్‌ విడుదల

భారతీయ చిత్రసీమను ఏలిన అగ్రకథానాయిక దివంగత శ్రీదేవి (Sridevi) నటించిన ‘ఇంగ్లిష్‌ వింగ్లిష్‌’ (English Vinglish) సినిమా చైనా ప్రేక్షకులను అలరించనుంది. ఆమె ఐదవ వర్ధంతి సందర్భంగా ఫిబ్రవరి 24న చైనాలో ఆరువేల థియేటర్లలో విడుదల కానుంది. గౌరీ షిండే దర్శకత్వం వహించిన ఈ చిత్రం ఇక్కడ మంచి ఆదరణ దక్కించుకుంది. ఒక గృహిణికి(శశి) సంబంధించిన కథ ఇది. ఆమెకి సరిగ్గా ఇంగ్లీష్‌ రాదని తన భర్త, పిల్లలు ఎగతాళి చేస్తూ ఉంటారు. ఆమె భాష నేర్చుకునే క్రమంలో తన గురించి మరింతగా తెలుసుకొని భార్యగా, తల్లిగా తన జీవితాన్ని విలువైనదిగా భావిస్తుంది. ఈ చిత్రాన్ని చైనాలో విడుదల చేస్తోన్న ఈరోస్‌ ఇంటర్నేషనల్‌ సీఓఓ కుమార్‌ అహుజా మాట్లాడుతూ..‘‘శ్రీదేవి కెరీర్‌లో మరపురాని సినిమాలలో ఒకటైన ఈ చిత్రాన్ని  చైనా ప్రేక్షకుల ముందుకు తీసుకొస్తున్నందుకు సంతోషిస్తున్నాము’ అని ఒక ప్రకటనలో తెలిపారు.