Shaakuntalam: శాకుంతలం మళ్లీ వాయిదా

సమంత (Samantha) ప్రధాన పాత్రలో నటించిన ‘శాకుంతలం’ (Shaakuntalam) మరోమారు వాయిదా పడింది. గతేడాది నవంబరులోనే విడుదల కావాల్సిన ఈ చిత్రం.. గ్రాఫిక్స్‌ పనులు ఆలస్యమవడం వల్ల వాయిదా పడిన సంగతి తెలిసిందే. ఈ పనులన్నీ కొలిక్కి రావడంతో ఈ నెల 17న విడుదల చేయాలని భావించారు. కానీ, ఇప్పుడీ సినిమాని మరోసారి వాయిదా వేస్తున్నట్లు చిత్ర బృందం ప్రకటించింది. ఈ మేరకు మంగళవారం సామాజిక మాధ్యమాల వేదికగా ఓ పోస్ట్‌ను పంచుకున్నారు. ‘‘ప్రియమైన ప్రేక్షకులకు ఈ విషయాన్ని చెప్పడానికి ఎంతో విచారిస్తున్నాం. ఈ నెల 17న ‘శాకుంతలం’ను విడుదల చేయలేకపోతున్నాం. కొత్త తేదీని త్వరలో ప్రకటిస్తాం’’ అని ఆ పోస్ట్‌లో పేర్కొన్నారు. కాళిదాసు రచించిన సంస్కృత నాటకం అభిజ్ఞాన శాకుంతలంలోని శకుంతల - దుష్యంతుల ప్రేమకథ ఆధారంగా గుణశేఖర్‌ తెరకెక్కించిన చిత్రమిది. టైటిల్‌ పాత్రను సమంత పోషించగా.. దుష్యంతుడి పాత్రలో దేవ్‌ మోహన్‌ (Dev Mohan) నటించారు. నీలిమ గుణ నిర్మాత. దిల్‌రాజు సమర్పిస్తున్నారు. మణిశర్మ స్వరాలందిస్తున్నారు.