Kangana Ranaut: రూ.500లతో ముంబయి వచ్చా

ఆకట్టుకునే నటనతోనే కాదు.. వివాదాస్పద వ్యాఖ్యలతో తరచూ వార్తల్లో ఉండే నటి కంగనా రనౌత్‌ (Kangana Ranaut). తను దర్శకనిర్మాతగా మారి ‘ఎమర్జెన్సీ’ని తెరకెక్కిస్తోంది. 1975నాటి ఎమర్జెన్సీ చీకటి రోజుల్లోని వాస్తవిక సంఘటనల ఆధారంగా ఈ చిత్రం రూపొందుతోంది. ఇందులో కంగనా మాజీ ప్రధాని ఇందిరాగాంధీ పాత్ర పోషిస్తోంది. ఈ సందర్భంగా ఆమె తన పాత ఇంటర్వ్యూల్లో చెప్పిన ఆసక్తికర విషయాలతో కూడిన ఓ వీడియోని ఆదివారం పంచుకుంది. ఇందులో తనకి వంటపై ఉన్న అమితమైన ఇష్టాన్ని తెలియజేసింది. ఆ ఇష్టంతోనే సొంతంగా ఒక రెస్టారెంట్‌ని ప్రారంభించాలనుకుంది. కానీ తను నటించిన చివరి చిత్రం ‘ధాకడ్‌’ తీవ్రంగా నిరాశ పరచడంతో ఆర్థిక ఇబ్బందుల కారణంగా ఆ ప్రయత్నం నెరవేరలేదట. తర్వాత తనే నిర్మాత, దర్శకురాలిగా మారి ‘ఎమర్జెన్సీ’ తెరకెక్కిస్తోంది. దీనికోసం కంగనా ఇంటితో సహా విలువైన వస్తువులన్నీ తాకట్టు పెట్టి మరీ ఈ సినిమా నిర్మిస్తున్నానని చెప్పింది. ఈ వివరాలే పేర్కొంటూ ‘చేతిలో ఐదువందల రూపాయలతో ముంబయి నగరానికి వచ్చాను. ఒకవేళ ఈ చిత్రంతో మొత్తం కోల్పోతే నేను మళ్లీ మొదటి పరిస్థితికే వస్తాను. అయినా నేనేం ఆత్మవిశ్వాసం కోల్పోను. నా కాళ్లపై నేను నిలబడతాననే నమ్మకం ఉంది’ అంటూ గతాన్ని ఓసారి గుర్తు చేసుకుంది కంగనా.