‘యానిమల్‌’ కోసం లండన్‌ పయనం

దక్షిణాదిలో అగ్రతారగా కొనసాగుతున్న రష్మిక బాలీవుడ్‌లో అడుగుపెట్టి ‘గుడ్‌బై’, ‘మిషన్‌ మజ్ను’ చిత్రాలతో ప్రేక్షకులకు పరిచయమైంది. వాటిలో ‘మిషన్‌ మజ్ను’ చిత్రంలో అంధురాలిగా నటించి ఆకట్టుకుంది రష్మిక. ఇప్పుడు ఆమె నటిస్తున్న మరో హిందీ చిత్రం ‘యానిమల్‌’. తెలుగు దర్శకుడు సందీప్‌రెడ్డి వంగా తెరకెక్కిస్తోన్న ఈ చిత్రంలో రణ్‌బీర్‌ కపూర్‌ కథానాయకుడు. ఇప్పటికే అత్యధిక శాతం షూటింగ్‌ పూర్తి చేసుకున్న ఈ గ్యాంగ్‌స్టర్‌ డ్రామా చిత్రం కీలక సన్నివేశాల చిత్రీకరణ లండన్‌లో జరగనుందని సమాచారం. ‘భారత్‌లో ‘యానిమల్‌’ చిత్రీకరణ పూర్తైంది. కీలకమైన చివరి షెడ్యూల్‌ని ఏప్రిల్‌ మొదటివారంలో యూకే, స్కాట్లాండ్‌లలో చిత్రీకరించనున్నాం. ఇది 25 రోజులపాటు కొనసాగనుంది’ అని సోమవారం చిత్రవర్గాలు చెప్పినట్లు తెలిసింది. బాబీ డియోల్‌, అనిల్‌కపూర్‌ తదితరులు ప్రధాన పాత్రల్లో నటిస్తున్న ఈ చిత్రం ఆగస్టు 15న రానుంది.