గర్వపడేలా చేశా..

రాజ్‌కుమార్‌రావు, భూమి పెడ్నెకర్‌ ప్రధాన పాత్రధారులుగా తెరకెక్కిన ‘భీడ్‌’ ఈమధ్యే ప్రేక్షకుల ముందుకొచ్చింది. అనుభవ్‌ సిన్హా ఈ చిత్ర దర్శకనిర్మాత. ఇందులో దియా మీర్జా గీతాంజలిగా ఓ కీలక భూమిక పోషించారు. ఆమె నటనకు అంతటా ప్రశంసలు దక్కుతున్నాయి. ఈ పొగడ్తలపై కృతజ్ఞతలు తెలుపుతూ దియామీర్జా సోమవారం సామాజిక మాధ్యమాల ద్వారా ఓ హృద్యమైన సందేశాన్ని పంచుకున్నారు. ‘‘భీడ్‌’లో నా నటన బాగుందని మెచ్చుకున్న అందరికీ నా కృతజ్ఞతలు. నిజానికి ఈ సినిమా కేవలం నా పిల్లల కోసమే చేశాను. కొన్నేళ్ల తర్వాత వాళ్లు ఈ చిత్రం తప్పకుండా చూస్తారు. సాటి మనుషుల పట్ల ఎలా సానుభూతి ప్రకటించాలో ఈ సినిమా చూసి నేర్చుకుంటారు. తమ తల్లి చేసిన ఈ మంచి పాత్ర పట్ల గర్వంగా ఫీలవుతారు. నాపై ఎనలేని గౌరవం చూపిస్తారు. ఇంత మంచి పాత్ర ఇచ్చినందుకు దర్శకుడు అనుభవ్‌ సిన్హాకి నేను వేలవేల ధన్యవాదాలు చెప్పుకోవాలి’ అని పేర్కొన్నారు. 2020 లాక్‌డౌన్‌ నేపథ్య కథాంశంతో వచ్చిన ‘భీడ్‌’ విమర్శకుల ప్రశంసలందుకుంటోంది.