కలం పట్టిన శ్రుతి..

శ్రుతిహాసన్‌లో మంచి నటితో పాటు అద్భుతమైన గాయని ఉన్న సంగతి తెలిసిందే. అంతేకాదు స్వయంగా పాటలు రాయడంతో పాటు వాటికి బాణీలు కట్టి మెప్పిస్తుంటుంది. తనలోని ఈ కోణాలన్నింటినీ ఇప్పటికే ప్రేక్షకులకు పరిచయం చేసింది శ్రుతి. అయితే ఇప్పుడామె కథా రచయితగా మరో కొత్త ప్రయాణం ప్రారంభించేందుకు ఆసక్తిగా ఎదురు చూస్తోందట. ఈ విషయాన్ని తనే స్వయంగా వెల్లడించింది. ‘‘కథ చెప్పే కళకు నేనెప్పుడూ అభిమానినే. ప్రేక్షకులకు కనెక్ట్‌ అయ్యేలా స్క్రిప్ట్‌ను రూపొందించడం నా కల. చిత్ర పరిశ్రమలో కొత్త ప్రయాణం కోసం ఆసక్తిగా ఎదురు చూస్తున్నా. త్వరలోనే అధికారికంగా ప్రకటించే అవకాశముంది’’ అని చెప్పుకొచ్చింది శ్రుతిహాసన్‌. ఆమె మాటల్ని బట్టి చూస్తే తనిప్పటికే ఓ కథ సిద్ధం చేసుకున్నట్లు అర్థమవుతోంది. శ్రుతి ప్రస్తుతం తెలుగులో ప్రభాస్‌తో కలిసి ‘సలార్‌’లో నటిస్తోంది. ‘ది ఐ’ అనే హాలీవుడ్‌ చిత్రం చేస్తోంది.