నేను ఎందుకు దాక్కోవాలి?

సమంత తన సినిమా పనులతో మళ్లీ బిజీ అయిపోయారు. ఒక పక్క ‘శాకుంతలం’ ప్రచార కార్యక్రమాల్ని కొనసాగిస్తూ... మరోవైపు ‘ఖుషి’ చిత్రీకరణలోనూ పాల్గొంటోంది. మయోసైటిస్‌తో బాధపడుతూ కొన్నాళ్లు  విరామం తీసుకున్న ఆమె, ఇప్పుడు పనిపై దృష్టిపెట్టారు. ‘శాకుంతలం’ ప్రచార కార్యక్రమాల్లో భాగంగా ఆమె మాట్లాడుతూ విడాకుల తర్వాత  తన జీవితంలో చోటు చేసుకున్న  పరిణామాల్ని పంచుకున్నారు. విడాకుల తర్వాత ‘పుష్ప’లో ప్రత్యేకగీతం చేసే అవకాశం వస్తే, చాలా మంది చెయ్యొద్దని సలహా ఇచ్చినట్టు చెప్పారు. నేనే తప్పు చేయనప్పుడు బాధపడుతూ,  ఇంట్లోనే ఎందుకు కూర్చోవాలని ఆ సలహాల్ని లెక్క చేయలేదన్నారు. ‘‘వైవాహిక బంధంలో నేను వందశాతం నిజాయతీగా ఉన్నా. కాకపోతే అది మేం అనుకున్నట్టుగా సాగలేదు. అలాంటప్పుడు నేనేదో నేరం చేసిన దానిలా ఎందుకు దాక్కోవాలి? అందుకే ఆ సలహాల్ని లెక్కచేయకుండా పాట చేయడానికి అంగీకరించా. నా పనే నన్ను మరింత ఉత్సాహంగా ముందుకు సాగడానికి దోహదం చేస్తోంది. పనే నన్ను ఈ స్థాయిలో నిలబెట్టింది. గత రెండున్నరేళ్లలో నా జీవితంలో చాలా జరిగాయి. కానీ అన్నిటినీ అధిగమిస్తూ సాగుతున్నా. మంచంపై నుంచి లేవలేని పరిస్థితి ఉంటే తప్ప, నేను పనికి దూరం కాను. కొన్ని నెలలు క్రితం అదే జరిగింది. ఇప్పుడు మళ్లీ నటిగా ప్రతి విషయంలోనూ పక్కాగా ఉండాలని, అందంగా కనిపించాలని కష్టపడుతున్నా’’ అని చెప్పుకొచ్చారు సమంత.