500 మందితో డెవిల్‌ పోరాటాలు

నందమూరి కల్యాణ్‌రామ్‌ కథానాయకుడిగా... అభిషేక్‌ పిక్చర్స్‌ పతాకంపై తెరకెక్కుతున్న చిత్రం ‘డెవిల్‌’. ది బ్రిటిష్‌ సీక్రెట్‌ ఏజెంట్‌... అనేది ఉపశీర్షిక. నవీన్‌ మేడారం దర్శకత్వం వహిస్తున్నారు. అభిషేక్‌ నామా నిర్మాత. దేవాన్ష్‌ నామా సమర్పకులు. ఈ సినిమా చిత్రీకరణ తుదిదశకు చేరుకుంది. ప్రస్తుతం పతాక సన్నివేశాల్లో భాగంగా 500 మందితో పోరాట ఘట్టాల్ని తెరకెక్కిస్తున్నట్టు సినీ వర్గాలు తెలిపాయి. వెంకట్‌ నేతృత్వంలో రూపొందుతున్న ఈ పోరాటఘట్టం తెలుగులోనే అత్యుత్తమ యాక్షన్‌ ఎపిసోడ్‌గా నిలుస్తుందని సినీ వర్గాలు తెలిపాయి. నిర్మాత మాట్లాడుతూ ‘‘ప్రేక్షకులకు కొత్త రకమైన సినిమాల్ని అందించాలనే తపన కలిగిన కథానాయకుడు కల్యాణ్‌రామ్‌. పీరియాడిక్‌ డ్రామాగా రూపొందుతున్న ఈ సినిమాలో ఆయన ఓ సరికొత్త అవతారంలో సందడి చేయనున్నారు. మా సంస్థలో రూపొందుతున్న ప్రతిష్టాత్మక చిత్రమిది. ఇప్పుడు తెరకెక్కిస్తున్న సన్నివేశాలు ప్రేక్షకుల్ని అబ్బురపరిచేలా ఉంటాయి. త్వరలోనే ఈ సినిమాకి సంబంధించిన మరిన్ని వివరాల్ని తెలియజేస్తామ’’ని చెప్పారు. ఈ చిత్రానికి కథ, స్క్రీన్‌ప్లే, సంభాషణలు: శ్రీకాంత్‌ విస్సా, సంగీతం: హర్షవర్ధన్‌ రామేశ్వర్‌, ప్రొడక్షన్‌ డిజైన్‌: గాంధీ నడికుడికర్‌, కూర్పు: తమ్మిరాజు, ఛాయాగ్రహణం: సౌందర్‌రాజన్‌.ఎస్‌.