సంక్షిప్త వార్తలు(2)

మనసులు ‘మధురం’

ఉదయ్‌, వైష్ణవి జంటగా నటించిన చిత్రం ‘మధురం’. రాజేష్‌ చికిలే దర్శకత్వం వహిస్తున్నారు. బంగార్రాజు.ఎం నిర్మాత. ఈ సినిమా ఫస్ట్‌లుక్‌ని కథానాయకుడు విష్వక్‌సేన్‌ విడుదల చేశారు. పోస్టర్‌ ఆసక్తిని రేకెత్తించేలా ఉందని, చిత్రం విజయవంతం కావాలని ఆకాంక్షిస్తున్నట్టు తెలిపారు. దర్శకుడు మాట్లాడుతూ ‘‘రెండు మనసుల నేపథ్యంలో సాగే ఓ స్వచ్ఛమైన ప్రేమకథ ఇది. హృదయాల్ని హత్తుకునే భావోద్వేగాలకి పెద్దపీట వేస్తూ చిత్రాన్ని తెరకెక్కించాం’’ అన్నారు. ‘‘విభిన్నమైన మా ప్రయత్నం ప్రేక్షకుల్ని తప్పకుండా మెప్పిస్తుంది. ఓ కొత్త అనుభూతిని పంచే చిత్రమిది’’ అన్నారు నిర్మాత.

కొత్త అందాల ‘గోదారి’

గోదావరి నదీ అందాలు, విశేషాల ఆధారంగా రూపొందిన డాక్యుమెంటరీ ‘గోదారి’. ఇది ఓటీటీలో గురువారం విడుదలైంది. ఈ సందర్భంగా నిర్మాత స్వాతి ముళ్లపూడి మాట్లాడుతూ.. గోదావరి నదీ విశిష్టతను, దాని చుట్టూ కోట్లమంది ప్రజలు అవలంబించే సంస్కృతి, సంప్రదాయాలు కళ్లకు కట్టినట్లు ఈ డాక్యుమెంటరీలో చూపించాం. ఇంతకుముందెన్నడూ చూడని గోదారి అందాలను ఇందులో చూడొచ్చు’’ అని చెప్పారు.