NTR: భయపెట్టేందుకు బరిలోకి ఎన్టీఆర్‌

భయమంటే ఎరుగని మృగాళ్లకు భయాన్ని పరిచయం చేసేందుకు రంగంలోకి దిగారు కథా నాయకుడు ఎన్టీఆర్‌ (NTR). ఇప్పుడాయన కొరటాల శివ (Koratala Siva) దర్శకత్వంలో ఓ పాన్‌ ఇండియా చిత్రం చేస్తున్న సంగతి తెలిసిందే. ‘జనతా గ్యారేజ్‌’ లాంటి హిట్‌ తర్వాత ఈ ఇద్దరి కలయికలో వస్తున్న రెండో సినిమా ఇది. ఎన్టీఆర్‌ ఆర్ట్స్‌, యువ సుధ ఆర్ట్స్‌ సంస్థలు సంయుక్తంగా నిర్మిస్తున్నాయి. జాన్వీ కపూర్‌ కథానాయిక. ఇటీవలే లాంఛనంగా మొదలైన ఈ సినిమా రెగ్యులర్‌ చిత్రీకరణ హైదరాబాద్‌లో జరుగుతోంది. తాజాగా ఈ చిత్ర సెట్‌లోకి ఎన్టీఆర్‌ అడుగు పెట్టారు. ఆయన ఈ విషయాన్ని శనివారం సామాజిక మాధ్యమాల ద్వారా ప్రకటించారు. దీంతో పాటు తను సెట్‌లోకి వెళ్లిన ఓ వీడియోను అభిమానులతో పంచుకున్నారు. ‘‘కొరటాల శివతో మళ్లీ సెట్స్‌పైకి రావడం చాలా బాగుంది’’ అంటూ ఆ వీడియోకి ఓ వ్యాఖ్యను జోడించారు తారక్‌. ఇది ఆయనకు 30వ సినిమా. విస్మరణకు గురైన ఓ తీర ప్రాంత నేపథ్య కథతో రూపొందుతోంది. భయమంటే ఏమిటో తెలియని అక్కడి మృగాళ్లకు భయాన్ని రుచి చూపించేందుకు కథానాయకుడు ఏం చేశాడన్నది ఆసక్తికరం. భారీ బడ్జెట్‌తో నిర్మితమవుతున్న ఈ సినిమా వచ్చే ఏడాది ఏప్రిల్‌ 5న ప్రేక్షకుల ముందుకు రానుంది. ఈ చిత్రానికి అనిరుధ్‌ స్వరాలందిస్తున్నారు.