Sai Pallavi: నేను ఇష్టపడేదాన్ని తెరపై చూపిస్తానంతే

గ్లామర్‌ పాత్రలకు ప్రాధాన్యం ఇస్తూ సినిమాల్లో అందంగా కనిపించాలని తపనపడుతుంటారు ఎక్కువ శాతం కథానాయికలు. సినిమాల్లోనే కాదు బయటకి కూడా మేకప్‌ లేకుండా రావడానికి ఇష్టపడరు. కానీ, తనకు మేకప్‌ లేకుండా నటించడమే ఇష్టమంటోంది సాయిపల్లవి (Sai Pllavi). ఇటీవల ఓ ఇంటర్వ్యూలో సినిమాలలో మేకప్‌ గురించి తనకు ఎలాంటి ఒత్తిడి లేదని చెప్పింది. ‘తెరపై అందంగా కనిపించాలంటే చాలా ఒత్తిడి ఉండవచ్చు. మరింత అందంగా కనిపించడానికి మేకప్‌ సహాయం చేయదని నేను చెప్పడం లేదు. ఇది మీకు ఆత్మవిశ్వాసాన్ని కలిగిస్తే వేసుకోవచ్చు. నాకు మేకప్‌ లేకుండా కూడా నటించగలననే నమ్మకం ఉంది’ అని చెప్పింది. డ్యాన్స్‌ విషయంలో తనకంటూ ప్రత్యేక గుర్తింపు తెచ్చుకున్న ఆమె సినిమాల్లో డ్యాన్స్‌ విషయంలో ఐశ్వర్వరాయ్‌, మాధురీ దీక్షిత్‌, సరోజ్‌ ఖాన్‌లను ఆదర్శంగా తీసుకుంటానని చెప్పింది. ‘నన్ను క్రమశిక్షణలో ఉంచడంలో, నా శరీరంలో ఒక విధమైన లయను తీసుకురావడంలో డ్యాన్స్‌ ప్రధాన పాత్ర పోషిస్తుందని నేను అనుకోలేదు. నేను సినిమా స్టార్‌ని కాదు. కేవలం నేను ఇష్టపడే దాన్ని తెరపై చూపించే అవకాశాన్ని పొందినట్లుగా భావిస్తానంతే’ అని చెప్పింది సాయి పల్లవి.